لاہور: آوارہ کتوں کا دو کم سن بچوں پر حملہ، دونوں شدید زخمی

عدنان بھٹی سے

لاہور: لاہور کے علاقے سندر میں واقع ایک نجی ہاؤسنگ سوسائٹی میں آوارہ کتوں کے حملے میں دو کم سن بچے شدید زخمی ہو گئے، جبکہ واقعے کی سی سی ٹی وی فوٹیج بھی سامنے آ گئی ہے۔

تفصیلات کے مطابق آوارہ کتوں نے ایک بچی اور ایک بچے پر اچانک حملہ کر دیا۔ فوٹیج میں دیکھا جا سکتا ہے کہ ایک کتا بچی کو گھسیٹتے ہوئے سڑک کی جانب لے گیا، جبکہ اسی دوران دوسرے کتے نے ایک اور بچے کو اپنا نشانہ بنایا۔ گلی سے گزرنے والے ایک شہری نے بروقت مداخلت کرتے ہوئے دونوں بچوں کو کتوں سے بچایا۔

حملے میں زخمی ہونے والے بچوں کو فوری طور پر قریبی ہسپتال منتقل کیا گیا، جہاں انہیں طبی امداد فراہم کی جا رہی ہے۔

واقعے کے بعد علاقہ مکینوں نے کمشنر لاہور، ڈپٹی کمشنر لاہور، سوسائٹی انتظامیہ اور حکومت پنجاب سے فوری نوٹس لینے کا مطالبہ کرتے ہوئے کہا ہے کہ آوارہ کتوں کی بڑھتی تعداد بچوں اور دیگر شہریوں کی جانوں کے لیے سنگین خطرہ بنتی جا رہی ہے۔

شہریوں نے سوسائٹی انتظامیہ سے مطالبہ کیا کہ آوارہ کتوں کے مؤثر سدباب، ویکسینیشن یا دیگر مناسب اقدامات فوری کیے جائیں تاکہ مستقبل میں ایسے افسوسناک واقعات کی روک تھام ممکن بنائی جا سکے۔

ڈپٹی کمشنر لاہور کیپٹن ر علی اعجاز نے واقعہ کا نوٹس لیتے ہوئے متعلقہ اسسٹنٹ کمشنر صدر سے رپورٹ طلب کی ہے کیپٹن ر علی اعجاز کا کہنا تھا آوارہ کتوں کا کم سن بچوں پر حملہ افسوس ناک ہے جلد سدباب کیلئے سفارشات مرتب کر کے حکومت پنجاب کو بھیج دی جائینگی۔