پنجاب میں جدید زرعی آلات کی مقامی تیاری کیلئے مشترکہ حکمت عملی پر اتفاق

لاہور: صوبائی وزیر صنعت و تجارت چوہدری شافع حسین نے پی اینڈ ڈی ٹاور میں محکمہ زراعت کے دفتر کا دورہ کیا، جہاں انہوں نے صوبائی وزیر زراعت سید عاشق حسین کرمانی کے ہمراہ اجلاس کی صدارت کی۔ اجلاس میں ہارویسٹر، سپرسیڈر، ٹریکٹر اور دیگر جدید زرعی آلات کی مقامی سطح پر تیاری کے فروغ، ایگری میکانائزیشن اور زرعی شعبے کی ترقی سے متعلق مختلف تجاویز کا جائزہ لیا گیا۔

اجلاس میں اس بات پر اتفاق کیا گیا کہ جدید زراعت کے فروغ کے لیے صنعت اور زراعت کے محکمے باہمی تعاون سے کام کریں گے، جبکہ جدید زرعی آلات کی مقامی مینوفیکچرنگ کے لیے مقامی صنعتکاروں اور چین سمیت دیگر ممالک کی کمپنیوں کے ساتھ جوائنٹ وینچر کے امکانات بھی تلاش کیے جائیں گے۔ صوبائی وزیر زراعت نے گجرات میں ایگری مال کے قیام کی تجویز سے بھی اتفاق کیا۔

اس موقع پر چوہدری شافع حسین نے کہا کہ وزیراعلیٰ پنجاب کی قیادت میں حکومت نے جدید زراعت اور ایگری میکانائزیشن کے فروغ کے لیے اربوں روپے کی سرمایہ کاری کی ہے۔ انہوں نے کہا کہ زراعت قومی معیشت کی ریڑھ کی ہڈی ہے اور صوبے کی بڑی آبادی کا روزگار اس شعبے سے وابستہ ہے، تاہم ماضی میں اس اہم شعبے کو نظر انداز کیا گیا۔

انہوں نے بتایا کہ جدید زراعت کے فروغ کے لیے چین کے ہواوے گروپ کے ساتھ اشتراک جاری ہے، جبکہ جدید زرعی آلات کی مقامی تیاری کے لیے چین اور دیگر ممالک کی کمپنیوں سے بھی بات چیت کی جائے گی۔ ان کا کہنا تھا کہ سیڈ ڈیولپمنٹ پر خصوصی توجہ دینے اور محکمہ اوقاف کی زمینوں پر سویابین کی کاشت کی منصوبہ بندی بھی کی گئی ہے۔ انہوں نے صنعتکاروں پر زور دیا کہ وہ وزیراعلیٰ آسان کاروبار فنانس اسکیم سے فائدہ اٹھا کر ایگرو بیسڈ انڈسٹری کے فروغ میں اپنا کردار ادا کریں۔

صوبائی وزیر زراعت سید عاشق حسین کرمانی نے کہا کہ وزیراعلیٰ پنجاب نے جدید زراعت کے فروغ کے لیے تاریخی اقدامات کیے ہیں اور گزشتہ اڑھائی برس کے دوران اس شعبے پر اربوں روپے خرچ کیے گئے ہیں۔ انہوں نے کہا کہ کسان کارڈ کے ذریعے کاشتکاروں کو زرعی لوازمات کی خریداری میں سہولت فراہم کی گئی ہے، جبکہ حکومت مزید آسان قرضہ اسکیمیں بھی متعارف کرا رہی ہے۔

انہوں نے کہا کہ حکومت چاہتی ہے کہ ہارویسٹر، سپرسیڈر، ٹریکٹر اور دیگر جدید زرعی آلات مقامی سطح پر تیار ہوں تاکہ زرعی لاگت میں کمی اور ایگرو بیسڈ انڈسٹری کے فروغ کو یقینی بنایا جا سکے۔ اجلاس میں سیکرٹری زراعت، اسپیشل سیکرٹری زراعت، اسپیشل سیکرٹری انڈسٹریز اور دیگر متعلقہ افسران نے بھی شرکت کی۔