لاہور: غیر قانونی افغان باشندوں کے خلاف بلاامتیاز کارروائی کا حکم

لاہور: ڈی آئی جی آپریشنز لاہور فیصل کامران نے کہا ہے کہ غیر قانونی طور پر مقیم افغان باشندوں کی موجودگی کسی صورت برداشت نہیں کی جائے گی اور ان کی گرفتاری، جانچ پڑتال اور قانونی کارروائی میں کسی بھی قسم کی غفلت ناقابل قبول ہوگی۔

سول لائنز ڈویژن کی اینٹی کرائم میٹنگ کی صدارت کرتے ہوئے ڈی آئی جی آپریشنز نے قانون پر بلاامتیاز عملدرآمد یقینی بنانے کی ہدایت کی۔ اجلاس میں ایس پی سکیورٹی، ایس پی سول لائنز، سرکل افسران اور متعلقہ تھانوں کے ایس ایچ اوز نے شرکت کی۔

فیصل کامران نے ناقص سپرویژن پر ایس ڈی پی او مزنگ کو وضاحتی لیٹر جاری کرنے کا حکم دیا، جبکہ ایس ایچ او قلعہ گجر سنگھ اور لٹن روڈ کو جرائم پیشہ عناصر کے خلاف کارروائیاں مزید مؤثر بنانے کی ہدایت کی۔ ایس ایچ او سول لائنز کو اشتہاری مجرمان کی گرفتاری کے مقررہ اہداف ہر صورت مکمل کرنے کا بھی حکم دیا گیا۔

ڈی آئی جی آپریشنز نے کہا کہ تمام افسران کانفرنس کالز پر بروقت اور مؤثر رسپانس کو یقینی بنائیں، جبکہ تعلیمی اداروں کے اطراف منشیات کی روک تھام کے لیے خصوصی اقدامات کیے جائیں۔ انہوں نے گٹکا فروشوں کے خلاف کریک ڈاؤن مزید تیز کرنے، نوجوان نسل کو اس ناسور سے محفوظ رکھنے، غیر قانونی اسلحہ رکھنے اور ہوائی فائرنگ کرنے والوں کے خلاف سخت کارروائی کی بھی ہدایت کی۔

انہوں نے ایس آئی پیز کو ایس او پیز پر سختی سے عملدرآمد کرانے، قماربازوں اور قحبہ خانوں کے خلاف بلاامتیاز کارروائی کرنے اور تھانوں میں آنے والے سائلین کے ساتھ عزت و احترام سے پیش آکر ان کے مسائل ترجیحی بنیادوں پر حل کرنے کی بھی تاکید کی۔