ڈیزل سستا ہونے پرکرایوں میں کمی کا اعلان

ویب ڈ یسک: ڈیزل کی قیمت میں 32 روپے فی لیٹر کمی کے بعد آل پاکستان گڈز ٹرانسپورٹرز نے مال بردار گاڑیوں کے کرایوں میں 10 فیصد کمی کا اعلان کردیا۔

صدر آل پاکستان گڈز ٹرانسپورٹرز نبیل محمود طارق نے ڈیزل کی قیمت میں کمی کے حکومتی فیصلے کا خیرمقدم کرتے ہوئے کہا کہ اس اقدام سے تجارتی سامان کی ترسیل کے اخراجات میں کمی آئے گی۔

نبیل محمود طارق کا کہنا تھا کہ ایندھن کی قیمتوں میں مسلسل اضافے کے باعث ٹرانسپورٹ کے شعبے کو مشکلات کا سامنا تھا، تاہم ڈیزل کی قیمت کم ہونے سے ان مشکلات میں کمی آنے کی امید ہے۔

انہوں نے کہا کہ گڈز ٹرانسپورٹرز نے ڈیزل کی قیمت میں کمی کا فائدہ کاروباری طبقے اور صارفین تک منتقل کرنے کے لیے مال بردار گاڑیوں کے کرایوں میں 10 فیصد کمی کا فیصلہ کیا ہے۔

صدر آل پاکستان گڈز ٹرانسپورٹرز نے حکومت سے مطالبہ کیا کہ ڈیزل کی قیمت میں کمی کو کم از کم ایک ہفتے تک برقرار رکھا جائے تاکہ ٹرانسپورٹرز اور کاروباری طبقہ اس کمی کے ثمرات سے بھرپور فائدہ اٹھا سکے۔

کرایوں میں کمی سے تجارتی سامان کی ترسیل کے اخراجات کم ہونے کے ساتھ مختلف اشیا کی قیمتوں پر بھی مثبت اثر پڑنے کی توقع کی جا رہی ہے۔