پاکستان سعودی عرب کی حفاظت کے لیے کسی بھی حد تک جانے کے لیے مکمل تیار ہے، ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان عملی طور پر سعودی عرب کی مدد کے لیے وہاں موجود ہے اور سفارتی لحاظ سے بھی سعودی عرب کے ساتھ کھڑا ہے۔

عرب نیوز کو خصوصی انٹرویو میں انہوں نے کہا کہ پاکستان حرمین شریفین اور سعودی عرب کی حفاظت کے لیے کسی بھی حد تک جانے کے لیے مکمل تیار ہے۔

انہوں نے کہا سعودی عرب کو دفاع کے لیے جس طرح کی بھی مدد درکار ہوگی، پاکستان اس کے لیے تیار ہے اور سعودی عرب کی مدد جاری رکھے گا۔

ڈی جی آئی ایس پی آر نے کہا کہ پاکستانی عوام سعودی عرب کے بھائیوں اور بہنوں کے ساتھ شانہ بشانہ کھڑے ہیں اور اس میں کسی کو شک و شبہ نہیں ہونا چاہیے۔

انہوں نے کہا پاکستان سعودی عرب کے خلاف ہونے والی کسی بھی جارحیت کا دفاع کرتا رہے گا۔

لیفٹیننٹ جنرل احمد شریف چوہدری نے کہا پاکستان کی سیاسی و عسکری قیادت مسلسل سعودی قیادت کے ساتھ رابطے میں ہے۔

انہوں نے کہا پاکستان سنجیدگی اور خلوص کے ساتھ خطے کے ممالک اور شراکت داروں کے تعاون سے اس پیچیدہ صورتحال کا پرامن اور مذاکراتی حل تلاش کر رہا ہے۔

ڈی جی آئی ایس پی آر نے کہا پاکستان کا موقف واضح ہے کہ مسائل کا حل بات چیت اور سفارت کاری سے ہی ممکن ہے۔

انہوں نے کہا پاکستان نے مکہ مشترکہ دفاعی معاہدے اور اسٹریٹجک باہمی دفاعی معاہدے کے تحت کیے گئے وعدوں اور عزم کی پاسداری کی ہے۔