سرگودھا ریجن پولیس کے 8 شہداء کے ورثاء میں پلاٹوں کے کاغذات تقسیم

سرگودھا: سرگودھا ریجن پولیس نے پولیس شہداء کی لازوال قربانیوں کو خراجِ عقیدت پیش کرنے اور ان کے اہلِ خانہ کی فلاح و بہبود کے لیے اہم اقدام کرتے ہوئے آٹھ شہداء کے ورثاء میں رہائشی پلاٹوں کے ملکیتی کاغذات تقسیم کر دیے۔

اس سلسلے میں منعقدہ تقریب میں کمشنر سرگودھا حافظ شوکت علی، ریجنل پولیس آفیسر (آر پی او) سہیل اختر سکھیرا اور ڈسٹرکٹ پولیس آفیسر (ڈی پی او) خوشاب توقیر محمد نعیم نے شرکت کی۔

آر پی او سہیل اختر سکھیرا کی خصوصی کاوشوں سے شہداء کے ورثاء کو سرگودھا لاہور روڈ پر واقع جدید ہاؤسنگ سوسائٹی میں رہائشی پلاٹ الاٹ کیے گئے۔ پلاٹوں کے کاغذات حاصل کرنے والوں میں شہید ڈرائیور کانسٹیبل مظہر حسین سمیت شہید کانسٹیبل سیف اللہ، محمد ریاض، محمد وارث، محمد جمیل، محمد سرفراز، عابد حسین اور ساجد حسین کے ورثاء شامل ہیں۔

اس موقع پر آر پی او سہیل اختر سکھیرا نے کہا کہ پولیس شہداء ہمارا فخر ہیں اور ان کی لازوال قربانیوں کو ہمیشہ یاد رکھا جائے گا۔ شہداء کے اہلِ خانہ کی خدمت، دیکھ بھال اور فلاح و بہبود پولیس کی ترجیحات میں شامل ہے۔

کمشنر حافظ شوکت علی نے شہداء کے ورثاء کی عملی سرپرستی اور معاونت کے لیے سرگودھا ریجن پولیس کی کاوش کو قابلِ تحسین قرار دیا۔

سرگودھا ریجن پولیس نے اس عزم کا اعادہ کیا کہ شہداء کے خاندانوں کی فلاح و بہبود اور عملی معاونت کا سلسلہ جاری رکھا جائے گا۔