قومی سلامتی کمیٹی اجلاس ميں افغانستان کی صورتحال پر بات ہوگی: وزیرخارجہ

تفصیلات کے مطابق شاہ محمود قریشی نے افغانستان کی صورتحال کے حوالے سے اہم بیان دیتے ہوئے کہا ہے کہ آج وزيراعظم عمران خان نے قومی سلامتی کمیٹی کا اجلاس طلب کيا ہے، اجلاس ميں افغانستان کی صورتحال کا جائزہ ليا جائے گا۔شاہ محمود قريشی  نے کہا کہ افغانستان کا اہم وفد پاکستان ميں مشاورت کيلئے موجود ہے، افغان وفد امن کے عمل کو آگے بڑھانے کيلئے پاکستان ميں موجود ہے۔ان کا کہنا تھا کہ آج دفتر خارجہ ميں افغان وفد سے اہم ملاقات ہوگی، افغان وفد سے افغانستان کی بہتری اور امن و استحکام کيلئے بات ہوگی۔

وزیر خارجہ نے مزید کہا   کہ بھارت کو موجودہ حالات پر ذمےداری کا ثبوت دينا چاہيے ، دنيا امن و استحکام کی خواہاں ہے۔ دنيا توقع کرتی ہے کہ بھارت مثبت کردار ادا کرے اور خطے کي بہتری کيلئے بھی بھارت کو ذمےداری دکھانا ہوگی۔

یاد رہے کہ وزیراعظم عمران خان کی زیر صدارت قومی سلامتی کمیٹی کا اجلاس آج ہوگا۔قومی سلامتی کمیٹی کے اجلاس میں اعلیٰ سول و عسکری حکام شریک ہوں گے۔ذرائع  کے مطابق  اجلاس میں طالبان کی پیش قدمی اور افغانستان کی مجموعی صورت حال پر مشاورت ہوگی، اجلاس میں ملک کی داخلی سیکیورٹی سمیت افغانستان سے جڑے معاملات پر مشاورت ہوگی۔اجلاس میں وزیر اعظم عمران خان افغانستان کی صورتحال پراپنی پالیسی واضح  کریں گے۔