وزیراعظم کا ملک بھر میں یکساں قومی نصاب کے پہلے مرحلے کا اجراء

تفصیلات کے مطابق وزیر اعظم عمران خان نے اس موقع پر اظہار خیال کرتے ہوئے کہا کہ ملک میں یکساں نصاب لانا اور طبقاتی نظام تعلیم کا خاتمہ ان کی سوچ تھی۔انہوں نے کہا کہ اس وقت دنیا میں تین نصاب ہیں جبکہ پاکستان میں سرکاری اور نجی تعلیمی اداروں اور مدارس کے طلبہ کیلئے مختلف نصاب پڑھایا جا رہا ہے۔

وزیر اعظم نے کہا کہ یکساں نصاب ہمارے نوجوانوں کو ایک سمت دے گا اور غیر ملکی ثقافتوں کی یلغار سے چھٹکارا ملے گا۔عمران خان نے کہا کہ آٹھویں، نویں اور دسویں جماعت کے طلبہ کو حضرت محمد ۖ خاتم النبین کی حیات مبارکہ اور تعلیمات سے متعلق پڑھانے کا بھی فیصلہ کیا گیا ہے۔انہوں نے وزیر تعلیم سے کہا کہ مشاورت کے بعد اگلے پانچ سے چھ ماہ میں ان کلاسوں کیلئے یکساں نصاب نافذ کیا جائے۔وزیر اعظم نے کہا کہ اقلیتوں کو بھی اپنے مذاہب سیکھنے سے متعلق موقع فراہم کیا جائے گا۔

وزیر تعلیم شفقت محمود نے اس موقع پر اظہار خیال کرتے ہوئے کہا کہ پنجاب، خیبر پختونخوا، گلگت بلتستان اور آزاد کشمیر میں یکساں قومی تعلیمی نصاب کے پہلے مرحلے کا نفاذ کیا جا رہا ہے۔انہوں نے کہا کہ ہماری کوشش ہے کہ سندھ بھی یہ نصاب اپنائے۔وفاقی وزیر نے یکساں قومی تعلیمی نصاب متعارف کرانے کو معاشرے میں ناانصافی کے خاتمے کے سلسلے میں بڑا اقدام قرار دیا۔