پاکستان کی اپوزیشن جماعتوں میں دنیا کے حالات سمجھنے کی صلاحیت نہیں:شیخ رشید

تفصیلات کے مطابق وفاقی وزیر داخلہ کا کہنا ہے کہ حزب اختلاف بیچتی کیا ہے؟ ان کا سودا بک گیا ہےاب حزب اختلاف پچھتائے گی اور 2 سال میں نیب کیسز کا فیصلہ ہو جائے گا،ہمیں ایک اور نیک ہو کر ملک کا بہتر تشخص اجاگر کرنا چاہیے۔

انہوں نے کہا کہ دنیا کی سب سے بڑی سیاست پاکستان کے ارد گرد ہو رہی ہے جبکہ بھارتی میڈیا پاکستان کے خلاف منفی پراپیگنڈے میں مصروف ہے۔ دنیا یہ نہ بھولے ہمارے 80 ہزار شہری شہید ہوئے۔

شیخ رشید کا کہنا تھا  کہ افغانستان کی صورتحال پر گہری نظر ہے اور پاک فوج نے امن کے قیام کے لیے جدوجہد کی جبکہ ہم نے دہشت گردی کے خلاف جنگ میں ہزاروں قربانیاں دی ہیں۔

انہوں نے کہا کہ پاکستان خطے میں اہم ملک بننے جا رہا ہے اور پی ڈی ایم لاری اڈہ لاری اڈہ کھیل رہے ہیں۔ پاکستان ذمہ دار ایٹمی قوت کا حامل ملک ہے اور افغانستان سے آنے والوں کے لیے 21دن اور ایک ماہ کے ٹرانزٹ ویزے دے رہے ہیں۔

ان کا مزید کہنا تھا کہ طالبان نے یقین دلایا ہے افغانستان کی سرزمین پاکستان کے خلاف استعمال نہیں ہو گی پاک افغان 2 ہزار 600 کلومیٹر کی سرحد پر باڑ لگائی ہے۔