پاکستان تحریک انصاف پہلی حکومت ہے جو انتخابی اصلاحات کی بات کررہی ہے:فواد چوہدری

تفصیلات کے مطابق وفاقی وزیر اطلاعات کا میڈیا سے گفتگو کرتے ہوئے کہنا تھا کہ انتخابی اصلاحات پر بحث ایک بنیادی بحث ہے، اگر انتخابات آزادانہ، منصفانہ اور شفاف نہ ہوں تو ملک میں جمہوریت کا تصور نہیں ہو سکتا۔

فواد چوہدری نے کہا کہ ہم کوشش کررہے ہیں کہ اپوزیشن کے ساتھ انتخابی اصلاحات پر بات آگے بڑھائیں، بدقسمتی سے ہمارے اپوزیشن کے لوگوں کو ہر صورت مخالفت ہی کرنی ہے ۔

انہوں نے کہاکہ شہباز شریف اور بلاول بھٹو نے اب تک انتخابی اصلاحات کو پڑھنے کی ضرورت بھی محسوس نہیں کی، یہ بہت غیرسنجیدہ رویہ ہے، نہ انہوں نے ڈویلپمنٹ اتھارٹی کو پڑھنے کی ضرورت محسوس کی اور اس پر ایک بحث شروع کردی اور انتخابی اصلاحات کا بھی یہی معاملہ ہے۔

ان کا کہنا تھا کہ جب تک انتخابات کا طریقہ کار اس حد تک منصفانہ، آزادانہ اور غیرجانبدارانہ نہیں ہوتا کہ اس پر کوئی انگلی نہ اٹھا سکے، اس وقت تک یہ کہنا مشکل ہے کہ جمہوریت کی جڑیں مضبوط ہوں گی لہٰذا ہم پوری کوشش کررہے ہیں، اپوزیشن اپنی تجاوز بھی سامنے لے آئے، ہم اس پر بھی بات کرنے کے لیے تیار ہیں۔

وزیر اطلاعات کا کہنا تھا کہ کابینہ کو روس اور پاکستان کے درمیان تین ارب ڈالر کے پائپ لائن منصوبے سے بھی آگاہ کیا گیا، اس سے دونوں ملکوں کے درمیان ایک نئی جہت اور اقتصادی راستہ کھل جائے گا جبکہ وزیر اعظم نے روس کے صدر ولادمیر پیوٹن کو دورہ پاکستان کی دعوت بھی دی ہے۔

ان کا مزید کہنا تھا کہ وزیراعظم نے وزیر خزانہ شوکت ترین اور حماد اظہر کو کہا ہے کہ ایل پی جی سیلنڈر کی قیمت نیچے لانا ضروری ہے، پاکستان کے صرف 28فیصد پائپ گیس کا استعمال کرتے ہیں اور بقیہ تمام لوگ ایل پی جی سیلنڈر کا استعمال کرتے ہیں۔