افغانستان پرطالبان کے کنٹرول سے افریقی جہادی گروپوں کی حوصلہ افزائی ہوگی :انتونیو گتریس

تفصیلات کے مطابق اقوام متحدہ کے سیکریٹری جنرل انٹونیو گوٹریس نے غیرملکی خبرایجنسی کو انٹرویو  دیتے ہوئے  کہا کہ  افریقی ممالک کےشہریوں کو محفوظ بنانے کیلئے سیکیورٹی میکنزم کو مضبوط بنانے کی ضرورت ہے۔ اقوام متحدہ کے سیکریٹری جنرل کا کہنا تھا کہ عالمی برادری کو افغانستان میں طالبان کے ساتھ مذاکرات جاری رکھنا ہوں گے  ، ملک میں معاشی بدحالی سے ممکنہ طور پر لاکھوں افراد ہلاک ہوسکتے ہیں، طالبان کوبراہ راست اپنے اصولوں سے آگاہ کرنے کیلئے ان سے بات چیت  کا عمل جاری رکھنا ہوگا ، طالبان قیادت کیساتھ  مذاکرات سے ہم افغان شہریوں کے ساتھ یکجہتی کا اظہار کرسکتے ہیں۔

سیکرٹری جنرل اقوام متحدہ نے کہا کہ عالمی برادری اگر چاہتی ہے کہ افغانستان پھر سےدہشتگردی کا گڑھ نہ بنے تو ہمیں طالبان اور افغانیوں کی ہر ممکن مدد کرنا ہوگی،  ہمارا یہ اقدام  عالمی برادری کے مفاد میں ہے۔

انتونیو گوتریس کا مزید کہنا تھا کہ طالبان چاہتے ہیں انھیں عالمی سطح پر تسلیم کیا جائے، ان پر سے پابندیاں ہٹائی جائیں اور ان کی مالی معاونت کی جائے۔ اگر ہم یہ سب مان لیں تواس سے عالمی برادری طالبان قیادت پردباؤ برقرار رکھ  سکتی ہے۔

واضح رہے کہ طالبان کی جانب سے 7 ستمبر 2021 کو عبوری حکومت کا اعلان کیا گیا تھا جس میں ملا محمد حسن اخوند کو افغانستان کا وزیراعظم جبکہ ملا عبدالغنی برادر اور مولوی عبدالسلام حنفی کو نائب وزرائے اعظم مقرر کیا گیا تھا۔