کورونا ویکسین کا دوسرا بڑا فائدہ سامنے آگیا

غیر ملکی خبررساں ادارےکے مطابق حال ہی میں امریکا میں ہونے والی ایک نئی طبی تحقیق میں محققین نے ویکسین سے متعلق  انتہائی خوش آئند خبر دے دی ۔ یہ تحقیق بنیادی طور پر سدرن کیلیفورنیا یونیورسٹی کے ایل طویل المعیاد پراجیکٹ کا حصہ ہے جس کا مقصدکورونا کی وبا سے امریکی عوام کی ذہنی صحت پر مرتب اثرات کی جانچ پڑتال کرنا ہے۔

 امریکی محقیقین نے  یہ دعویٰ کیا ہے کہ کورونا ویکسینیشن سے نہ صرف کورونا وائرس سے ہونے والی بیماری کوویڈ 19 سے تحفظ ملتا ہے بلکہ اس سے ذہنی صحت بھی بہتر ہوتی ہے۔سدرن کیلیفورنیا یونیورسٹی کی تحقیق میں ایسے شواہد ملے ہیں جن سے عندیہ ملتا ہے کہ کوویڈ 19 سے بچاؤ کے لیے ویکسی نیشن کرانے کے بعد لوگوں   کے ذہنی تناؤ میں کمی آتی ہے  اور ذہنی صحت میں بہتری آتی ہے۔

اس پراجیکٹ کے لیے امریکا بھر میں 8 ہزار سے زیادہ افراد کو سروے فارم بھیجے گئے تھے تاکہ وبا سے ذہنی صحت پر مرتب ہونے والے اثرات کا جائزہ لیا جاسکے۔ سرویز کے ڈیٹا سے ثابت ہوا کہ لوگوں کی اکثریت کو وبا کے باعث کسی حد تک ذہنی بے چینی اور ڈپریشن کا سامنا ہوا۔ابتدائی نتائج کے بعد محققین کی جانب سے ہر 2 ہفتے بعد ان افراد کو سروے فارم بھیج کر ذہنی صحت میں آنے والی تبدیلیوں کو دیکھا گیا۔ تازہ ترین سروے میں ان افراد سے کوویڈ 19 ویکسینز کے استعمال کے بعد ذہنی صحت پر مرتب اثرات کے بارے میں پوچھا گیا تھا۔

محققین نے دریافت کیا کہ جو لوگ پہلے بہت زیادہ تناؤ کا شکار  تھے ویکسینیشن کے بعد ان کے ڈپریشن کی شرح میں 15 فیصد جبکہ معمولی ڈپریشن کی شرح میں 4 فیصد تک کمی آئی۔ محققین نے اس ڈیٹا کی بنیاد پر یہ تخمینہ بھی لگایا کہ ممکنہ طور پر ویکسینیشن  کے بعد 10 لاکھ افراد کے ذہنی دباؤ میں کمی آئی ۔

محققین کے مطابق  اکٹھے کیے گئے ڈیٹا سے  یہ خیال کیا جارہا ہے کہ کوویڈ  19 سے بچاؤ کے لیے ویکسینیشن کرانا لوگوں کو بیماری سے ہی تحفظ فراہم نہیں کرتا بلکہ  بیماری کے شکار ہونے کے  خوف  اور بے چینی کو بھی نمایاں حد تک کم کردیتا ہے۔ محققین کے مطابق تحقیق میں فی الحال یہ جائزہ نہیں لیا گیا کہ ویکسینیشن سے لوگوں کی ذہنی صحت میں کس حد تک بہتری آتی ہے تاہم  ویکسین کے ذہنی صحت پر اثرات کے حوالے سے  اس پراجیکٹ پر   مزید کام کیا جارہا ہے ۔