عالمی برادری کو افغانستان کی معاونت کیلئے آگے بڑھنا ہو گا  : وزیر خارجہ

ہسپانوی وزیر خارجہ  جوزے البرس اور وزیر خارجہ شاہ محمود قریشی نے وفود کی سطح پر مذاکرات کے بعد مشترکہ پریس کانفرنس کی جس میں  شاہ محمود قریشی نے کہا کہ  افغانستان کیلئے وسائل کی دستیابی کو ممکن بنایا جائے،افغانستان کے فنڈز کا انجماد مفید نہیں ہو گا، افغانستان کو مالی بحران سے بچانے اور معاونت کیلئے عالمی برادری کو آگے بڑھنے کی ضرورت ہے۔

وزیر خارجہ نے کہا کہ  پاکستان اور سپین کے درمیان گہرے دو طرفہ تعلقات ہیں۔افغانستان کے حوالے سے پاکستان اور سپین کے نقطہ نظر میں مماثلت ہے۔دونوں ممالک پرامن، مستحکم اور خوشحال افغانستان کے متمنی ہیں لیکن سوال یہ ہے کہ ان مقاصد کا حصول کیسے ممکن ہو؟

شاہ محمود قریشی کا کہنا تھا کہ دنیا کو افغانستان میں نئی حقیقت کو سمجھنے کی ضرورت ہے۔ عالمی برادری کو افغانستان کی معاونت کیلئے آگے بڑھنا ہو گا ۔موجودہ صورتحال میں افغانستان کو تنہا چھوڑنے کے مضمرات شدید نوعیت کے ہو سکتے ہیں،ہمیں افغانستان کی طرف سے مثبت رویے کی حوصلہ افزائی کرنی چاہیے۔

وزیر خارجہ  نے کہا کہ پاکستان، افغانستان کی معاونت جاری رکھے ہوئے ہے، کل، ہمارا ایک جہاز خوراک اور ادویات لے کر کابل پہنچا،ہم اپنے محدود وسائل کے باوجود، ہوائی اور زمینی راستوں سے افغان بھائیوں کی انسانی بنیادوں پر معاونت جاری رکھیں گے۔انہوں نے کہا کہ  افغانستان سے واپسی کے متمنی افراد کا محفوظ انخلا عالمی برادری کی خواہشات کے مطابق ہے۔ کل کابل سے 200 افراد کو لیکر ایک پرواز دوحہ پہنچی ہے۔

شاہ محمود قریشی  کا کہنا تھا کہ سپین کیلئے پاکستان میں سرمایہ کاری کے بہترین مواقع میسر ہیں۔پاکستان کی بہتر صورتحال کو مدنظر رکھتے ہوئے بہت سے ممالک نے ٹریول ایڈوایزی پر نظر ثانی کی ہے۔میں نے اسی تناظر میں، سپین کے وزیر خارجہ سے پاکستان کے حوالے سے ٹریول ایڈوایزی پر نظر ثانی کیے جانے کا مطالبہ کیا ہے۔

ان کا مزید کہنا تھا کہ   میں نے فیٹف کے حوالے سے پاکستان کی طرف سے اٹھائے گئے ٹھوس عملی اقدامات سے آگاہ کیا اور جی ایس پی پلس اسٹیٹس کے حوالے سے سپین کی طرف سے پاکستان کی مسلسل حمایت پر اسپین کے وزیر خارجہ کا شکریہ ادا کیا۔