پاکستان عالمی سیاحت اورکھیلوں کیلئے محفوظ ملک ہے: آرمی چیف

 پاک فوج کے شعبہ تعلقات عامہ (آئی ایس پی آر ) کے مطابق آرمی چیف جنرل قمر جاوید باجوہ سے پاکستان میں تعینات  یونانی سفیر کی ملاقات ہوئی ہے ،ملاقات  میں  باہمی دلچسپی کے امور، علاقائی سلامتی کی صورتحال پر تبادلہ خیال کیاگیا ہے ۔ آئی ایس پی آر کے مطابق  ملاقات میں علاقائی سلامتی بالخصوص افغانستان کی موجودہ صورتحال پر بات چیت ہوئی۔ ملاقات میں مختلف شعبوں میں پاک یونان تعلقات کے فروغ سے متعلق امور پر بھی تبادلہ خیال کیا گیا۔

اس موقع پر آرمی چیف جنرل قمر جاوید باجوہ  نے کہا کہ پاکستان خطے میں امن کے لیے عالمی شراکت داروں کے ساتھ تعاون اورافغان عوام کے مستحکم و خوشحال مستقبل یقینی بنانے کے لیے پرعزم ہیں۔انہوں نے کہاکہ پاکستان  عالمی سیاحت، کھیلوں  اور تجارتی سرگرمیوں  کے لیے محفوظ ملک ہے۔ ہم مشترکہ مفادات کے تمام امور میں صحت مندانہ باہمی رابطوں کی حوصلہ افزائی کرتے ہیں۔

آئی ایس پی آر کے مطابق یونان کے سفیر نے کورونا وباء سے نمٹنے کے لیے پاکستان کی کوششوں کی تعریف  کی ۔ یونانی سفیر نے افغان صورتحال میں پاکستان کے کردار بشمول کامیاب انخلاء آپریشن اور خطے کے استحکام کی کوششوں کوسراہا ۔