ڈرامے کی ریٹنگ اور کمائی سب کچھ نہیں: روبینہ اشرف

تفصیلات کے مطابق ایک انٹرویو میں اپنے کیریئر، اداکاری تجربات اور پروجیکٹس سے متعلق گفتگو کرتے ہوئے ان کا کہنا تھا کہ ماضی میں پاکستانی ڈرامے ہالی وڈ اور بالی وڈ فلموں سے مقابلہ کیا کرتے تھے مگر اب حالت سب کے سامنے ہے۔

روبینہ اشرف کا کہنا تھا کہ جب انہوں نے ٹیلی ویژن پر کام شروع کیا تو وہ اپنے سینئر اداکاروں کی اداکاری اور ڈائیلاگز کی ادائیگی سے کام کرنا سیکھتی تھیں۔ لوگوں نے مجھے سکھایا ہے اور اب میرا کام ہے میں دوسروں کو بتا دیتی ہوں لیکن اگر آپ نہیں سیکھیں گے تو آپ کی اسکرین پر عمر کم ہو جائے گی ۔

 ان کا کہنا تھا کہ اداکاری ایک ایسا شفاف کام ہے کہ ادھر آپ کرتے ہیں ادھر اس کا نتیجہ سامنے آجاتا ہے۔ جس دن صحیح کام کیا اوپر اور جس دن غلط کام کیا نیچے۔ اس لیے یہاں کس کا بیٹا، بیٹی ہونا یا تعلق داری کام نہیں آتی۔

روبینہ اشرف کا اپنی زندگی میں آئے ایک کڑے وقت اور بیٹیوں کے ساتھ کا ذکر کرتے ہوئے کہنا تھا کہ وہ بہت یقین سے سمجھتی ہیں کہ ماں باپ کو ہمیشہ بیٹیاں ہی زندہ رکھتی ہیں، جن کی بیٹیاں ہیں وہ یقیناً میرے اس جملے کو سمجھ جائیں گے۔

ان کا مزید کہنا تھا کہ میں کووڈ کی وجہ سے تقریباً ڈیڑھ ماہ اسپتال میں رہی تھی اور اس دوران میری حالت اتنی زیادہ خراب تھی کہ مجھے دنیا کے بارے میں کوئی خبر نہیں تھی صرف یہ معلوم تھا کہ میرے ساتھ کیا ہورہا ہے جو کہ بہت برا تھا۔