بھارت : ایمبولنسز اب سائرن کی جگہ بانسری بجائیں گی

سڑکوں پر تیزی سے  دوڑتی ہوئی  ایمبولینس اپنے آپ میں ایک انوکھی گاڑی ہے۔ ایمبولینس ایک جان بچانے والی گاڑی ہے جو مریضوں کو اسپتال پہنچانے کا کام کرتی ہے۔ دنیا بھر میں ایمبولینس سائرن کی مخصوص آواز کا مقصد ارد گرد پیدل چلنے والوں اور گاڑیاں چلانے والوں کو ہنگامی صورتِ حال سے خبردار کرنا ہوتا ہے تاکہ وہ راستہ چھوڑ دیں اور ایمبولینس کو گزرنے دیں۔

بھارت میں ایمبولینس سائرن کی مخصوص آواز کو روایتی بانسری اور طبلے کی موسیقی سے بدلنے کا منصوبہ بنا لیا گیا ہے ۔ اس کی تصدیق گزشتہ دنوں نئی دہلی کے یونین روڈ  ٹرانسپورٹ منسٹر،نتن گاڈکری نے اپنے ایک بیان میں کی ہے ۔

ان کا کہنا تھا کہ ایمبولینس سائرن کی چیختی چنگھاڑتی آواز سے لوگوں پر برا اثر پڑتا ہے اور وہ بوکھلاہٹ کا شکار ہوجاتے ہیں۔اس کے برعکس بانسری، طبلے اور ہارمونیم جیسے آلاتِ موسیقی پر روایتی دھنوں کی آواز، سننے والوں کو ایک خوشگوار احساس دیتی ہے۔

نتن گاڈکری کے مطابق، ان کی وزارت میں مختلف دھنوں کا جائزہ لیا جارہا ہے جو بہت جلد ایمبولینس سائرن کی جگہ لیں گی اور اس  کا  آغاز دارالحکومت نئی دہلی سے ہوگا۔

اس تبدیلی کے ممکنہ اثرات سے متعلق کچھ بھی کہنا قبل از وقت ہوگا لیکن یہ پہلو اپنی جگہ اہمیت رکھتا ہے کہ ایمبولینس کوئی عام گاڑی نہیں بلکہ یہ ہنگامی حالات میں مریضوں اور زخمیوں تک کم سے کم وقت میں طبّی امداد پہنچانے میں استعمال ہوتی ہے۔