سی پیک کے منصوبے تیزی سے آگے بڑھ رہے ہیں : وزیراعظم 

تفصیلات کے مطابق وزیر اعظم عمران خان نے  افتتاحی تقریب سے خطاب کرتے ہوئے کہا کہ مٹیاری لاہور ٹرانسمیشن لائن اسٹیٹ آف دی آرٹ منصوبہ ہے، حماد اظہر، چینی سفیر اور دیگر کو اس منصوبے کی تکمیل پر مبارکباد دیتا ہوں۔

ان کا کہنا ہے کہ  پچھلے تین سالوں میں اس منصوبے پر تیزی سے کام ہوا، ٹرانسمیشن لائن پرانی ہوگئی ہیں، لائن لاسز زیادہ ہیں، جس کی وجہ سے بجلی ہوتے ہوئے بھی بجلی نہیں بچا سکتے، لائن لاسز بڑھنے سے بوجھ عوام پر پڑتا ہے، نئے منصوبے سے بجلی کی بچت ہوگی، ٹرانسمیشن لائن جدید خطوط پر استوار کی گئی ہے اور اس میں لائن لاسز محض 4 فیصد ہیں، اب تک لائن لاسز 17 فیصد تھے۔ ایک فیصد لائن لاسز کی صورت میں کئی ارب روپے کا نقصان ہوتا ہے۔

وزیر اعظم  نے کہا کہ کورونا کی وجہ سے سی پیک کے منصوبے متاثر ہوئے تھے لیکن اب وہ تیزی سے تکمیل کی جانب بڑھ رہے ہیں۔ سی پیک کے منصوبے تیز ہونگے اور عارضی مہنگائی بھی نیچے آئے گی، ملک میں پیسہ آئے گا تو قرض دینے کے قابل ہوسکیں گے ۔

انہوں  نے کہا کہ سابق ادوار میں ٹرانسمیشن لائن پر سرمایہ کاری نہیں کی گئی اور یوں لائن سز میں غیرمعمولی اضافہ ہوا۔اب صنعتی ترقی کی جانب ساری توجہ مرکوز ہے کیونکہ صنعتی ترقی کے بغیر ملک آگے نہیں بڑھ سکتا اور ملکی قرضہ نہیں اتر سکتا۔

ان کاکہنا تھا کہ نئی ٹیکنالوجی کے استعمال کو بڑھ کر صنعتی ترقی میں حائل رکاوٹ دور کریں گے اور یقینی طور پر اس طرح ملکی خزانے میں اضافہ ہوگا۔

عمران خان نے کہا کہ کورونا کے باعث ساری دنیا میں کھانے پینے کی چیزوں کی قیمتیں بڑھی ہیں، ملک میں ویکسین لگتی جارہی ہے، کورونا کا خوف کم ہوتا جارہا ہے۔ وزیراعظم  نے اشیا کی قیمتوں میں اضافے سے متعلق کہا کہ کورونا کی وجہ سے سپلائی چین متاثر ہوئی اور یوں پوری دنیا میں اشیا کی قیمتوں میں اضافہ ہوا لیکن یہ مہنگائی عارضی ہے اور جیسے ہی ویکسینیشن کا عمل مکمل ہوگا تو معمولات زندگی بحال ہوجائے گی۔

واضح رہے کہ 886 کلومیٹر طویل ٹرانسمیشن لائن 4000 میگاواٹ بجلی ترسیل کرنے کی  صلاحیت رکھتی ہے اور اس کے لیے 1973 ٹاورز تعمیر کیے گئے ہیں۔