سعودی عرب کے ساتھ معاشی پیکج فائنل ہو گیا: وزیر خزانہ 

میڈیا سے گفتگو کرتے ہوئے وزیر خزانہ شوکت ترین کا کہنا تھا کہ سعودی عرب کے ساتھ معاشی پیکج فائنل ہو گیا، سعودی عرب نے پاکستان کو 3.6 ارب ڈالر فراہم کرنے کی یقین دہانی کرائی ہے، یہ رقم دو سال میں پاکستان استعمال کر سکے گا۔

 وزیر خزانہ شوکت ترین نے کہا کہ اس رقم سے پاکستان تیل کی خریداری بھی کر سکے گا،  پاکستان ماہانہ پندرہ کروڑ ڈالر کی رقم ماہانہ فراہم کی جائے گی۔

 دو روز قبل  وزیر خزانہ نے  قومی اسمبلی میں خطاب کرتے ہوئے کہا تھا کہ خام تیل کی عالمی قیمتوں میں اضافے کے بعد پاکستان نے سعودی عرب سے درخواست کی تھی اور  سعودی عرب کے ساتھ تیل کی فراہمی کا معاہدہ تکمیل کے قریب ہے۔

واضح رہے کہ  سعودی عرب نے 2018 کے آخر میں پاکستان کو چھ ارب 20 کروڑ ڈالر کا مالی پیکیج دیا تھا جس میں تین ارب ڈالر کی نقد امداد اور تین ارب 20 کروڑ ڈالرز کی سالانہ تیل و گیس کی موخرادائیگیوں کی سہولت شامل تھی۔