شوبز شخصیات بھی عمر شریف کے انتقال پر افسردہ

تفصیلات کے مطابق پاکستان کے نامور کامیڈین سہیل احمد کا کہنا تھا کہ عمر شریف بین الاقوامی سطح پر ہمارے جانے پہچانے فنکار تھے، وہ بہت پیارے انسان تھے، لاہور میں میرے محلے میں ہی رہتے تھے، عمر شریف کی علالت کے دوران لاہور میں ان کی رہائش گاہ جاتا تھا، عمر شریف ایک حساس انسان تھے، ان کے پورے خاندان میں ذیابطیس کا مرض بہت زیادہ ہے، عمر شریف نے پورے خاندان کے بچوں کو پالا، ان کا خیال رکھا۔

جاوید شیخ کا کہنا تھا کہ میرا اور عمر شریف کا ساتھ 40 سال رہا، عمر شریف جیسا انسان شاید ہی پاکستان کی انٹرٹینمنٹ کی دنیا میں کبھی آئے۔

اداکار ہمایوں سعید کا کہنا تھا کہ عمر شریف کے بارے میں جان کر بہت دکھ ہوا، وہ بلا شبہ کامیڈی کنگ تھا، اللہ ان کی روح کو سلامت رکھے، ہم آپ کو یاد کریں گے ،عمر بھائی۔

اداکارہ عتیقہ اوڈھو کا کہنا ہے کہ عمرشریف نے پاکستان کا نام پوری دنیا میں روشن کیا، عمرشریف اور معین اختر نے صرف اداکاری ہی نہیں انسانیت بھی سکھائی، برے وقت میں بہت سے لوگوں نے میرا ساتھ چھوڑ دیا، مگر عمرشریف نےساتھ دیا۔

گلوکارابرار الحق کا کہنا تھا کہ ہمیں ہنسانے والا آج ہمیں رلا کر چلاگیا،عمر شریف کی حب الوطنی اور انسان دوستی کو نہیں بھلایا جا سکتا۔

معروف اداکارہ بابرہ شریف کا کہنا تھا کہ عمر شریف نے لوگوں کے روزگار کا انتظام کیا تھا،ان جیسا انسان صدیوں میں پیدا ہوتا ہے،عمر شریف ہمارے لیے جو کرتے تھے شاید ہی ملک کا سربراہ کرے،عمر شریف کہتے تھے کہ  بابرہ شریف اورعمر شریف کے نام سے ایک فلم آنی چاہیے۔