سمندری طوفان شاہین: عمانی حکام کا ملک میں دو روز کی عام تعطیل کا اعلان

غیر ملکی خبر رساں ادارے کے مطابق سمندری طوفان شاہین عمان کی ساحلی حدود سے 130کلومیٹر دوررہ گیا۔ طوفان سے قبل تیز ہواؤں اور بارشوں کا سلسلہ عمان میں داخل ہوگیا،نشیبی علاقوں اور ساحل کے قریب مقیم افراد کو محفوظ مقامات پر منتقل ہونے کی ہدایات کردی گئی۔

عمانی حکام نےملک میں   آج  اور کل  عام تعطیل کا اعلان  کیا ہے۔  سمندری طوفان سے نمٹنے کے لیےتیاریاں مکمل کرلی گئی ہیں۔عرب موسمیاتی سروس کا کہنا ہے کہ سمندری طوفان شاہین کے عمان پربراہ راست اثرات مرتب ہوں گے ۔

عمان کے قومی قدرتی آفات پیشگی انتباہی مرکزکے مطابق تازہ سیٹلائٹ تصاویر اور موسمی چارٹس کے تجزیے سے پتا چلا ہے کہ سمندری طوفان ’’شاہین‘‘ شدت اختیار کرچکا ہے اور اب وہ سمندری طوفان کی کیٹگری ایک میں شامل ہے،جس کے نتیجے میں تیز ہوائیں چلیں گی اور200 سے 600 ملی میٹرتک موسلا دار بارشیں ہوگی ۔

ملک کےشمالی البطینہ، جنوبی البطینہ، مسقط، الظہیرہ، البریمی اورالداخلیہ کی ریاستوں میں شدید سیلاب کے خطرات بھی موجود ہیں۔