عامر لیاقت حسین  قومی اسمبلی  کی نشست سے مستعفی

تفصیلات کے مطابق سماجی رابطے  کی ویب سائٹ ’ٹوئٹر‘ پر جاری  ایک بیان میں  انہوں نے  استعفی سے متعلق آگاہ  کرتے ہوئے لکھا کہ قو می اسمبلی سے استعفی ارسال کردیا ہے،  اللہ تعالی عمران خان اور پی ٹی آئی کا حامی و نا صر ہو ۔ اللہ حافظ۔

قومی اسمبلی سے استعفی ارسال کردیا ہے اللہ تعالی عمران خان اور پی ٹی آئی کا حامی و نا صر ہو ۔ اللہ حافظ

— Aamir Liaquat Husain (@AamirLiaquat) October 3, 2021

 عامر لیاقت نے اپنے مستعفی ہونے کی فی الحال کوئی وجہ بیان نہیں کی ہے اور نہ ہی انہوں نے اپنے ٹویٹ میں  یہ بتایا ہے کہ استعفیٰ کس کو بھیجا ہے۔   قواعد و ضوابط کے مطابق استعفیٰ اسپیکر قومی اسمبلی کو بھیجا جانا چاہیے۔

واضح رہے کہ گزشتہ سال جولائی میں بھی عامر لیاقت حسین نے قومی اسمبلی کی رکنیت سے مستعفی ہونے کا اعلان کیا تھا اور اس کی وجہ کراچی میں بجلی بحران کے حل کے لیے کچھ نہ کرپانے کو قرار دیا تھا۔ تاہم چند روز بعد ان کا کہنا تھا کہ وزیر اعظم نے ان کا رکنیت سے استعفیٰ مسترد کردیا اور کراچی کے مسائل حل کرنے کی یقین دہانی کرائی ہے  ۔

خیال رہے کہ عامر لیاقت نے اپنے سیاسی سفر کا آغاز متحدہ قومی موومنٹ سے کیا تھا اور سابق صدر پرویز مشرف کے دور حکومت میں وہ 3 سال تک وزیر مذہبی امور بھی رہے تھے، تاہم مارچ 2018 میں انہوں نے تحریک انصاف  میں شمولیت اختیار کرلی تھی۔