قومی ٹی ٹوئنٹی کپ:   لاہور میں آج دو میچز کھیلے جائیں گے 

تفصیلات کے مطابق قومی ٹی ٹوئنٹی کپ میں آج دو روز کے وقفے کے بعد  قذافی اسٹیڈیم لاہور میں دو میچز کھیلے جائیں گے ۔   پہلامیچ سنٹرل پنجاب اورسندھ کے درمیان دوپہر تین بجے  کھیلاجائے گا جبکہ دوسرے میچ میں بلوچستان اور ناردرن کی ٹیمیں ساڑھے سات بجے مدمقابل ہوں گی۔ 

قومی کرکٹ ٹیم کےکپتان بابر اعظم سینٹرل پنجاب کی قیادت کریں گے،  جبکہ سرفراز احمد کی کپتانی میں  سندھ کی ٹیم میدان میں اترے گی ۔ سینٹرل پنجاب کے کپتان بابراعظم 71.5 کی اوسط سے 286 رنز بناکر اب تک ٹورنامنٹ کے ٹاپ اسکورر ہیں۔ ایونٹ میں ایک سنچری بنانے کے ساتھ ساتھ ٹی20 کرکٹ میں سب سے کم اننگز میں 7ہزار رنز بنانےوالے پہلے بیٹسمین بھی بن گئے ہیں۔

اسی طرح  دوسرے میچ میں  نائب کپتان قومی ٹیم شاداب خان ناردرن کی قیادت کریں گے جبکہ امام الحق بلوچستان کی ٹیم کی قیادت کریں گے ۔ ایونٹ میں بلوچستان نے 2 کامیابیوں کے ساتھ 4 پوائنٹس حاصل کر رکھے ہیں۔

خیال رہے کہ گزشتہ میچ میں سینٹرل پنجاب نے سندھ کو 12رنز سے شکست دی تھی ۔سندھ کی ٹیم پوائنٹس ٹیبل پر پہلی سے گر کر دوسری پوزیشن پر آگئی ہے جبکہ اس کی جگہ خیبرپختونخوا کی ٹیم نے لے لی ہے۔ 

واضح رہے کہ اس سے قبل  ٹورنامنٹ کا ایڈیشن 13-2012 قذافی اسٹیڈیم لاہور میں کھیلا گیا تھا۔