بلوچستان میں زلزلہ، پاک فوج کی جانب سے امدادی کارروائیوں کا آغاز 

تفصیلات کے مطابق آئی ایس پی آر نے بتایا ہے کہ پاک فوج کی جانب سے ضلع ہرنائی کی زلزلے سے متاثرہ آبادی کے لیے ضروری خوراک اور پناہ گاہیں منتقل کی گئی ہیں۔پاکستان آرمی کے ڈاکٹرز اور پیرا میڈیکس عملہ ضروری دواؤں کے ساتھ سول انتظامیہ کی مدد کر رہے ہیں۔

بلوچستان میں 5.9 شدت کا زلزلہ ، 24 افراد جاں بحق ، 300سے زائد زخمی

پاک فوج کے شعبۂ تعلقاتِ عامہ نے بتایا ہے کہ زلزلے کے 9 شدید زخمی پاک فوج کے ایوی ایشن ہیلی کاپٹرز کے ذریعے ہرنائی سے کوئٹہ پہنچائے گئےجبکہ  آئی جی ایف سی بلوچستان نارتھ نقصان کے تخمینے کے لیے ہرنائی پہنچ گئے ہیں۔آئی ایس پی آر نے یہ بھی بتایا ہے کہ پاک فوج کی اربن ریسرچ اور ریسکیو ٹیم کو راول پنڈی سے ہرنائی روانہ کیا جا رہا ہے۔

واضح رہے کہ بلوچستان کےمختلف علاقوں میں رات گئے 5.9 شدت کے زلزلے نے تباہی مچادی ، زلزلے  کے باعث 20 سے زائد افراد جاں بحق اور 300 سے زائد افراد زخمی ہوگئے ہیں ۔ ہرنائی اور شاہرگ میں 70 سے زائد مکانات کو بھی نقصان پہنچا ہے  جبکہ درجنوں  افراد ملبے تلے دب کر زخمی ہوئے ہیں جبکہ ہلاکتوں میں  بھی اضافے کا خدشہ ہے ۔ ہرنائی اور اس کے گرد و نواح میں نقصانات کی اطلاع کے پیش نظر ہسپتال  میں ڈاکٹرز اور عملہ ہنگامی بنیادوں پر طلب کر لیا گیا ہے ۔ پی ڈی ایم اے کے مطابق جاں بحق ہونے والوں میں زیادہ تعداد بچوں کی ہے، تمام علاقوں میں امدادی کارروائیاں جاری ہیں.