امریکی بحری آبدوز کو بڑا حادثہ ، متعدد اہلکار زخمی

بیجنگ: جوہری ہتھیاروں سے لیس امریکی آبدوزجنوبی بحیرہ چین میں حادثے کا شکار ہوگئی۔

امریکی بحریہ کی جانب سے جاری بیان میں بتایا گیا ہے کہ آبدوز یو ایس ایس کنیٹکی  کٹ جنوبی بحیرہ چین میں بین الااقوامی سمندری حدود میں کسی شے سے ٹکرائی تاہم آبدوز پر موجود عملے کے کسی بھی فرد کو شدید نوعیت کی چوٹیں نہیں لگیں ۔ 

امریکی حکام کا کہنا ہے کہ حادثے کے باوجود آبدوز یو ایس ایس کنیٹکی کٹ بالکل ٹھیک اور آپریشنل ہے تاہم حکام کی جانب سے یہ نہیں بتایا گیا کہ آبدوز کس چیز سے ٹکرائی ، کہاں ٹکرائی اور کتنے افرادزخمی ہوئے ۔ برطانوی خبرایجنسی کے مطابق امریکی حکام نے نام ظاہر نہ کرنے پر بتایا ہے کہ حادثے کا شکار ہونے والی آبدوز میں پندرہ افراد سوار تھے جنہیں معمولی قسم کی چوٹیں ضرور آئی ہیں ۔ 

دوسری جانب امریکی بحریہ کا کہنا ہے کہ عملے کی جان و مال کی حفاظت ہماری اولین ترجیع ہے ۔ واضح رہے  کہ جنوبی بحیرہ چین کا شمار دنیا کے سب سے زیادہ متنازع اور اہم آبی راستوں میں ہوتا ہے کیونکہ چین اس پورے علاقے کو اپنا حصہ کہتا ہے جبکہ ملائیشیا، برونائی، ویتنام، فلپائن اور تائیوان بھی اس علاقے پر اپنا دعویٰ کرتے ہیں۔