مینار پاکستان کیس: مرکزی ملزم ریمبو سمیت 8 افراد زیر حراست

تفصیلات کے مطابق  گریٹر اقبال پارک  کیس کے مرکزی ملزم ریمبو سمیت 8 افراد کو حراست میں لے لیا  گیا،  ایس پی سٹی انویسٹی گیشن  نے تصدیق کر دی ۔  پولیس نےعائشہ اکرم کے بیان کے بعد فوری ایکشن لیا  ہے اور  ملزمان کو تفتیش  کیلئےتھانہ لاری اڈہ سے سی آئی اے منتقل کر دیا گیا ہے۔

قبل ازیں  متاثرہ خاتون عائشہ اکرم نے ہیرو کو ولن بنادیا ،   عائشہ اکرم نے تمام واقعہ کا ذمہ دار اپنے ساتھی ریمبو کو ٹھہرا دیا  تھا۔  عائشہ نے ڈی آئی جی انوسٹی گیشن کو تحریری بیان جمع کروا دیا ۔

عائشہ اکرم  کا کہنا  تھا کہ  گریٹر اقبال پارک جانے کا پلان ریمبو نے ہی بنایا تھا ۔  ریمبو نے اپنے ساتھیوں کے ہمراہ میری نازیبا ویڈیوز بنارکھی ہیں ،   ویڈیوز کی وجہ سے ریمبو مجھے بلیک میل کرتا رہا ۔

 عائشہ اکرم نے الزام لگایا کہ   ریمبو مجھے بلیک میل کرکے دس لاکھ روپے لے چکا ہے ۔  میں اپنی تنخواہ میں سے آدھے پیسے ریمبو کو دیتی تھی ۔ ریمبو اپنے ساتھی بادشاہ کے ساتھ مل کر ٹک ٹاک گینگ چلاتا ہے ۔

واضح رہے کہ لاہور میں مینارِ پاکستان کے گریٹر اقبال پارک میں خاتون ٹک ٹاکر عائشہ اکرم کو ہراسگی اور بدتمیزی کا نشانہ بنانے کا واقعہ 14 اگست کے روز پیش آیا تھا۔یومِ آزادی کے موقع پر خاتون ٹک ٹاکر عائشہ اکرم سے ہوئی دست درازی کا خوفناک واقعہ 3 روز بعد سوشل میڈیا کے ذریعے سامنے آیا۔سینکڑوں نوجوانوں نے ٹک ٹاکر عائشہ اکرم اور اس کے ساتھیوں کو تشدد کا نشانہ بنایا اور کپڑے پھاڑ دیئے ۔