ریمبو کی گرفتاری چار پولیس اہلکاروں کی نوکری لے ڈوبی

لاہور : مینار پاکستان واقعہ کی متاثرہ لڑکی عائشہ اکرم کے ساتھ ریمبو کی گرفتاری کے بعد حوالات سے اس کی ویڈیو بنانے کے الزام میں چار پولیس اہلکاروں کو معطل کرتے ہوئے ان کے خلاف مقدمہ درج کرلیا گیا ہے ۔ 

تفصیلات کے مطابق ویڈیو بنانے کے معاملے میں انوسٹی گیشن انچارج سمیت چار اہلکارؤں کے خلاف دفعہ 155 سی کے تحت مقدمہ درج کیا گیا ہے ۔ ان اہلکاروں میں الیاس ، رمضان ، شہباز، اور نعیم شامل ہیں ۔ پولیس کا کہنا تھا کہ تمام افراد گرفتار کرتے ہوئے حوالات میں بندکردیا گیا ہے ۔ اہلکاروں نے ریمبو کا حوالات میں انٹرویو کروایا جس سے تفتیش متاثر ہوئی ۔ 

یاد رہے کہ ریمبو نے عدالت پیشی کے دوران انکشاف کیا کہ منظر عام پر آنے والی ویڈیو اور تصاویر ایک سال پرانی ہیں ،لڑکی کی مرضی کے بغیر کچھ نہیں ہو سکتا، عائشہ نے مجھے کہا کہ تمام ملزمان کو رہا کرواتے ہیں اور ان سے پانچ لاکھ روپے فی کس لیتے ہیں لیکن میں نے کہا کہ پیسوں کے پیچھے نہیں بلکہ اپنے کیس کے پیچھے بھاگو، عائشہ نے مجھے بلیک میل کیا کہ اگر بات نہ مانی تو جیل بھجوا دوں گی۔ریمبو نے کہا کہ راتوں رات مجھ پر ایف آئی آر درج کروائی گئی۔