جام کمال کی حکومت بچانے کیلئے مددکی درخواست ، جے یو آئی ف کا صاف انکار

تفصیلات کے مطابق  بلوچستان کی سیاست میں ہلچل ،   ہر گزرتے دن کے ساتھ وزیراعلیٰ بلوچستان کی  مشکلات میں اضافہ ہوتا جا رہا ہے اور جمعیت علمائے اسلام(ف) نے بھی وزیراعلیٰ کی مدد سے انکار کر دیا ہے۔ وزیراعلیٰ جام کمال نے جمعہ کو مولانا عبدالغفور حیدری کی رہائش گاہ جاکر ان سے ملاقات کی جس میں انہوں نے مولانا عبدالغفور حیدری سے اپنی حکومت بچانے کے لیے جے یو آئی سے مدد کی درخواست کی۔ تاہم  جمعیت علمائے اسلام (جے یو آئی) ف نے وزیرِ اعلیٰ بلوچستان جام کمال کی حمایت کی درخواست پر ان سے معذرت کر لی۔ مولانا عبدالغفور حیدری نے مولانا فضل الرحمٰن کو وزیرِ اعلیٰ بلوچستان جام کمال سے ملاقات کی تفصیلات سے آگاہ کیا۔ 

اس موقع پر مولانا فضل الرحمٰن نے کہا کہ  پانی سر سے گزر چکاہے ، جے یو آئی بلوچستان اور پارلیمانی پارٹی کے فیصلے درست ہیں۔ مولانا عبدالغفور حیدری نے مولانا فضل الرحمٰن سے کہا کہ 3 سال تک وزیرِ اعلیٰ بلوچستان جام کمال نے غیر جمہوری رویہ اپنایا۔

دوسری جانب بلوچستان کی سیاسی غیر یقینی صورتحال، بلوچستان عوامی پارٹی کے ناراض اراکین کی دوسری اہم بیٹھک آج ہوگی، اسپیکر عبدالقدوس بزنجو، سردار صالح بھوتانی اور جان جمالی کوئٹہ میں موجود ہیں۔ اس سے قبل  بلوچستان اسمبلی کی اپوزیشن جماعتوں کا اپوزیشن لیڈر ملک سکندر ایڈووکیٹ کی صدارت میں اجلاس ہوا جس میں جے یو آئی، بی این پی اور  پشتونخوا میپ کے پارلیمانی رہنماؤں نے شرکت کی جب کہ اجلاس میں وزیراعلیٰ جام کمال کے خلاف تحریک عدم اعتماد کے حوالے سے غور کیا گیا۔

واضح رہے کہ وزیراعلیٰ جام کمال خان کے خلاف احتجاج کے طور پر وزرا، پارلیمانی سیکریٹریز اور مشیروں نے استعفے دے دیے تھے۔وزیر اعلیٰ جام کمال خان کی جانب سے استعفیٰ دینے سے انکار کے بعد وزرا، مشیروں اور پارلیمانی سیکریٹریوں نے اپنے استعفے پیش کر دیے تھے۔