عمران نیازی دن رات یوٹرن مارتے ہیں:شہبازشریف

تفصیلات کے مطابق پی ڈی ایم کے سربراہ مولانا فضل الرحمان کے ہمراہ میڈیا سے گفتگو کرتے ہوئے شہباز شریف کا کہنا تھا کہ پی ڈی ایم کے اتحاد کے حوالے سے مولانا کے ساتھ گفتگو ہوئی ہےجبکہ ملکی صورتحال پر آج تفصیل سے گفتگو ہوئی ہے،چند دن پہلے حضرت نے مجھے صحت کے حوالے سے فون کیا تھا۔

شہباز شریف کا کہنا تھا کہ ملک میں بجلی ،گیس بل بم گرائے جا رہے ہیں،آٹے اور چینی کی قیمتیں آسمان سے باتیں کر رہی ہیں۔

مسلم ن کےصدر کا کہنا تھا کہ ڈینگی نے تباہی مچائی ہوئی ہے ،ہسپتالوں میں بیڈز پر جگہ نہیں ہے۔

ان کا کہنا تھا کہ تمام سیاسی پارٹیوں اور عوام کا حق ہے کہ ملک میں شفاف الیکشن کرائے جائیں،شفاف الیکشن ہی ملک کو ترقی پر لے جانے کا راستہ ہے۔

ان کا مزید کہنا تھا کہ دن رات محنت کرنی ہو گی یہ کام اب آسان نہیں ہے،اس کے بعد جا کر ہم 2018حکومت سے پہلے کی صورتحال پر آئیں گے،اس کے بعد ہم آگے کی ترقی کی سیڑھی چڑھیں گے۔

مولانا فضل الرحمان کا کہنا تھا کہ میاں صاحب کوچھوٹا سا حادثہ پیش آیا اور ڈاکٹروں نے آرام کا مشورہ دیا تو ان کی فون پر طبیعت دریافت کی۔

ان کا کہنا تھا کہ پی ڈی ایم اپنے مقاصد کیلئے متحرک ہے،14اکتوبر کو پشاور میں کانفرنس کا اعلان کیا ہے جبکہ 16اکتوبر کو فیصل آباد میں ایک تاریخی اجتماع ہو گا۔

پی ڈی ایم سربراہ کا کہنا تھا کہ 31 اکتوبر کو ڈیڑہ غازی خان میں جلسہ ہو گا ،حکومت قہر بن کر اس وقت مسلط ہے،حکومت سے خلاصی کی ہر آدمی کی ضرورت بن چکی ہے۔

مولانا فضل الرحمان کا کہنا تھا کہ تمام ادارے تباہ ہو چکے ہیں،جو ملازمین برطرف کیے گئے ہیں وہ مظاہرہ کر رہے ہیں ان کیساتھ یکجہتی کا اظہار کرتے ہیں۔

ان کا کہنا تھا کہ غریب آدمی آج اناج خریدنے کے قابل نہیں رہا ہے،یہ ایک سنجیدہ صورتحال ہے۔

مولانا فضل الرحمان کا مزید کہنا تھا کہ مودی ہمیں اتنا نقصان نہیں پہنچا سکتا تھا جتنا عمران خان نے پہنچایا ہے۔