عید میلاد النبی صلی اﷲ علیہ و آلہ وسلم منانے کیلئے ملک بھر میں  تیاریاں عروج پر

تفصیلات کے مطابق خاتم النبین صلی اﷲعلیہ و آلہ وسلم جن کی حیات طیبہ اور تعلیمات پوری کائنات کیلئے مشعل ِراہ ہیں انہیں ہدیہ عقیدت پیش کرنے کیلئے خصوصی کانفرنسز ، اجتماعات ،جلوس اور محافل میلاد کے انعقاد کا اہتمام کیا جائے گا۔عید میلاد النبی صلی اﷲ علیہ و آلہ وسلم کے سلسلے میں وزارت مذہبی امور کے زیر اہتمام دوروزہ رحمت اللعالمین کانفرنس کنونشن سینٹراسلا م آباد میں منعقد ہو گی۔تمام سرکاری اور نجی عمارتوں ،مکانوں ، دکانوں ، مارکیٹوں ، بازاروں ،مساجد اور گلیوں کو برقی قمقموں اور رنگ برنگی جھنڈیوں سے سجایا جا رہا ہے۔

وفاقی حکومت نے 12 ربیع الاول 19 اکتوبر بروز منگل کو ملک بھر میں عام تعطیل کا اعلان کررکھا ہے۔

خیال رہےکہ  ماہ ربیع الاول امت مسلمہ کے لیے خاص اہمیت کا حامل مہینہ ہے کیونکہ اس مہینے نبی آخرالزماں ﷺ کی دنیا میں تشریف آوری ہوئی، ہر سال 12 ربیع الاول کو سرور کائنات حضرت محمدﷺ کے یوم ولادت پر  دنیا بھر کے مسلمان جشن عید میلاد النبی ﷺ مناتے ہیں، اس موقع پر شہر بھر میں جلوسوں کا اہتمام کیا جاتا ہے۔