وزیراعظم 23 اکتوبر کو سعودی عرب روانہ ہوں گے

ترجمان دفتر خارجہ  سے جاری بیان کے مطابق وزیراعظم عمران خان، سعودی ولی عہد شہزادہ محمد بن سلمان عبدالعزیزکی دعوت پردورہ کر رہے ہیں ۔ دورہ کے دوران وزیراعظم عمران خان مڈل ایسٹ گرین انیشیٹیو سمٹ کی لانچنگ تقریب میں شرکت کریں گے، وزیراعظم عمران خان کے ہمراہ وزیر خارجہ اور کابینہ کے دیگر ارکان بھی وفد میں شامل ہوں گے۔ 

ترجمان دفتر خارجہ کے مطابق وزیراعظم  عمران خان سمٹ میں ماحولیاتی تبدیلیوں کی وجہ سے ترقی پذیر ممالک کو درپیش مسائل پر نقطہ نظر پیش کریں گے۔ 

 دورے کے دوران سعودی قیادت کے ساتھ دو طرفہ بات چیت بھی کریں گے، وزیراعظم پاکستان میں سرمایہ کاری کے فروغ کے حوالے سے منعقدہ تقریب میں بھی شرکت کریں گے۔ 

خیال رہے موسمیاتئ تحفظ اور ماحولیات سے متعلق اہم چیلنجوں کا سامنا کرنے میں عالمی برادری کی کوششوں کی حمایت میں مملکت کے اہم کردار کی بنیاد پر دارالحکومت ریاض میں 23 سے گرین مڈل ایسٹ اینیشی ایٹیو فورم کا انعقاد عمل میں لایا جائے گا جو25 اکتوبر 2021 تک جاری رہے گا۔