پنجاب کے ہر خاندان کوصحت کارڈز کے ذریعے علاج کی سہولت حاصل ہوگی: فواد چوہدری 

تفصیلات کے مطابق سماجی رابطے کی ویب سائٹ ٹوئٹر پر ایک بیان میں وفاقی وزیر اطلاعات و نشریات چوہدری فواد حسین  نے کہا کہ صحت، تعلیم اور چار بنیادی اشیائے ضرورت آٹا، چینی،دال اور گھی پر بڑا ریلیف لا رہے ہیں، بنیادی سیاسی اصلاحات کے بغیر ملک آگے نہیں جا سکتا۔ 

وفاقی وزیر اطلاعات نے کہا کہ خیبر پختونخوا کے بعد اب پنجاب کا ہر خاندان ہر سال دس لاکھ روپے تک صحت کارڈ کے ذریعے حاصل کر سکے گا، اس گیم چینجر پروگرام کے ذریعے اب کوالٹی علاج غریب ترین سے متوسط طبقے تک ہر فرد کو میسر ہو گا۔ 

انہوں نے کہا کہ صحت کارڈ پروگرام پنجاب میں ان شاء اللہ دسمبر سے شروع ہوگا اور مارچ تک پورے پنجاب میں صحت کارڈز مل جائیں گے۔

وفاقی وزیر اطلاعات نے ایک اور ٹویٹ میں  کہا کہ صحت کارڈ عوام اپنی مرضی کے کسی بھی ڈاکٹر یا ہسپتال میں استعمال کر سکیں گے، سرکاری ہی نہیں پرائیویٹ ڈاکٹر اور ہسپتال بھی اب عوام کے علاج کیلئے بلامعاوضہ میسر ہوں گے۔