وزیر اعظم کا چینی صدر سے ٹیلی فونک رابطہ، دوطرفہ تعلقات مستحکم بنانے پر اتفاق

تفصیلات کے مطابق وزیر اعظم آفس کے مطابق  وزیر اعظم عمران خان نے چینی صدر سے گفتگو کے دوران غربت کے خاتمے کی جنگ میں بے مثال فتح، اصلاحات اور چین کی شاندار ترقی کو سراہا۔

پاک چین رہنماؤں نے پاک چین اسٹریٹجک تعاون پر مبنی شراکت داری کے تمام پہلوؤں کا جائزہ لیا، علاقائی اور بین الاقوامی صورتِ حال پر تبادلۂ خیال بھی کیا۔

وزیر اعظم  نے کورونا وائرس کی وباء کے خلاف چین کے اقدامات کی تعریف کی، ترقی پذیر ممالک کے لیے چین کی انسدادِ کورونا امداد اور موسمیاتی تبدیلیوں سے نمٹنے کے لیے اقدام کو سراہا۔

پاک چین رہنماؤں میں  اقتصادی اور تجارتی تعلقات کو مزید مضبوط بنانے پر اتفاق  کیا گیا، افغانستان کی تازہ صورتِ حال پر بھی بات چیت ہوئی ۔ وزیر اعظم عمران خان نے کہا کہ افغان عوام کو معاشی مسائل سے نکالنے کے لیے دنیا کردار ادا کرے، افغانستان کو انسانی بحران سے بچانے کے لیے مدد کرنی ہو گی۔

وزیراعظم عمران خان نے سی پیک میں چینی سرمایہ کاروں کی دلچسپی کا خیر مقدم کیا ۔ وزیراعظم نے سی پیک کے تحت بننے والے منصوبے کے معیار اور بروقت تکمیل کو سراہا ۔ وزیراعظم کا کہنا تھا کہ ایم ایل 1 منصوبے کا جلد آغاز قومی اور علاقائی ترقی کے لئے پاکستان جیو اکنامکس ویژن کی تکمیل کریگا۔

وزیر اعظم عمران خان نے چینی صدر شی جن پنگ کو جلد دورۂ پاکستان کی دعوت بھی  دی۔