نئے ڈی جی آئی ایس آئی لیفٹیننٹ جنرل ندیم انجم کون ہیں ؟

تفصیلات کے مطابق لیفٹیننٹ جنرل فیض حمید کی جگہ ڈائریکٹر جنرل انٹر سروسز انٹیلی جنس مقرر ہونے والے لیفٹیننٹ جنرل ندیم انجم کو پنجاب رجمنٹ کی لائٹ اینٹی ٹینک بٹالین میں کمیشن ملا،  وہ آئی جی ایف سی بلوچستان (نارتھ) کے عہدے پر بھی تعینات رہے۔

لیفٹیننٹ جنرل ندیم انجم کور کمانڈر کراچی سمیت بہت سے اہم عہدوں پرخدمات سرانجام دے چکے ہیں،،انہوں نے کرم ایجنسی ہنگو میں آپریشن ضرب عضب کے دوران بریگیڈ کمانڈ کی، وہ شمالی وزیرستان اور ایل او سی پر بھی کمان کرچکے ہیں۔ پاک فوج میں لیفٹیننٹ جنرل ندیم انجم کو ایک پروفیشنل سولجر کے طور جانا جاتا ہے۔

لیفٹیننٹ جنرل ندیم انجم رائل کالج آف ڈیفنس سٹڈیزیو کے سے فارغ التحصیل ہیں،  انہوں نے ہونولولو سے بھی ڈگری حاصل کی،وہ کمبائینڈ آرمز سینٹر لندن کے گریجویٹ  بھی ہیں، انہوں نے کنگز کالج لندن، این ڈی یو،  ایڈوانس اسٹاف کورس یوکے،  اسٹاف کالج کوئٹہ ،ای پی سی ایس ایس امریکہ اور رائل کالج آف ڈیفنس اسٹڈیز یوکے میں بھی تعلیم حاصل کی۔

لیفٹیننٹ جنرل ندیم انجم کمانڈ،  اسٹاف اینڈ انسٹرکشنل اسائنمنٹس کا وسیع تجربہ رکھتے ہیں، وہ باسکٹ بال اور کرکٹ کے اچھے کھلاڑی بھی ہیں۔

قبل ازیں وزیراعظم عمران خان نے لیفٹیننٹ جنرل احمد انجم کی بطور ڈی جی آئی ایس کی تقرری کا نوٹیفکیشن جاری کیا تھا، وزیراعظم کے پرنسپل سیکرٹری اعظم خان کے دستخط سے نوٹیفکیشن جاری ہوا۔ نوٹیفکیشن کا اطلاق 20 نومبر 2021ء سے ہو گا۔ جبکہ لیفٹیننٹ جنرل فیض حمید 19 نومبر 2021ء تک بطور ڈی جی آئی ایس آئی کے فرائض انجام دیتے رہیں گے۔