پنجاب یونیورسٹی کی کیو ایس کی نئی عالمی درجہ بندی میں شاندار کامیابی

تفصیلات کے مطابق عالمی ادارے کیو ایس کی جانب سے ایشیاء کی جامعات کی نئی درجہ بندی  جاری کردی گئی، پنجاب یونیورسٹی  نے کیو ایس کی نئی عالمی درجہ بندی میں شاندار کامیابی حاصل کرلی۔ پنجاب یونیورسٹی نے تین سالوں میں 232 سے ترقی کرکے 145 ویں پوزیشن حاصل کر لی۔

پنجاب یونیورسٹی کی ایشین رینکنگ میں تین سالوں میں 87 درجے بہتری ہوئی ہے، کیو ایس نےپنجاب یونیورسٹی کو ایشیاء کی بہترین 22 فیصد جامعات میں شامل کر لیا۔2018 میں پنجاب یونیورسٹی ایشیا کی بہترین 54 فیصد جامعات میں شامل تھی۔

وائس چانسلر ڈاکٹر نیاز احمد کا کہنا ہے کہ  ایشین رینکنگ میں شاندار کامیابی انتظامیہ کی تعلیمی و تحقیقی پالیسیوں کا نتیجہ ہے، گڈ گورننس کے باعث پنجاب یونیورسٹی کی عالمی رینکنگ میں بہتری آئی۔ 

ڈاکٹر نیاز احمد نے ایشین رینکنگ میں بہتری پر اساتذہ، ملازمین اور طلبہ کو مبارکباد دی۔ ڈاکٹر نیاز احمد نے کہا کہ    چیئرمین رینکنگ کمیٹی ڈاکٹر خالد محمود اور ان کی ٹیم کی کوششیں لائق تحسین ہیں۔