اسلام آباد میٹرو اسٹیشن کے واش روم سے بچی کی لاش برآمد

تفصیلات کے مطابق میٹرو اسٹیشن کے واش روم سے گزشتہ رات  بچی کی لاش برآمدگی کا معاملہ سامنے آیا ہے ۔  ترجمان اسلام آباد پولیس ضیا باجوہ کا کہنا  تھا  کہ ایس ایس پی انوسٹی گیشن کی سربراہی میں تحقیقاتی ٹیم بنا دی گئی ہے۔  بچی کے جسم پر تشدد کے نشانات واضح ہیں،  امدادی ٹیموں نے بچی کی لاش کو پمز اسپتال منتقل کردیا ہے۔  بچی کی عمر11 یا 12 سال بتائی جا رہی ہے۔ بچی کی لاش پوسٹ مارٹم کے لئے ہسپتال منتقل کردی گئی ہے۔

 اسلام آباد پولیس نے میٹرواسٹیشن کے دو سیکورٹی گارڈز کو حراست میں لے لیا گیا ہے ۔  پولیس کی جانب سے  سیکورٹی گارڈز سے واقعہ  سے متعلق پوچھ گچھ جاری ہے ۔

  پولیس ذرائع کے مطابق گارڈز  نے اپنے  بیان میں بتایا ہے کہ  صبح 8 بجے کے قریب کتوں کے بھونکنے پر اس جگہ پہنچے تو لاش دیکھی ،  عمومی طور پر میٹرو کے واش رومز کو تالے لگے ہوتے تھے،  تاہم جہاں سے بچی کی لاش ملی یہاں تالہ نہیں لگاتے تھے۔ گارڈزنے مزید بتایا ہے کہ  واش روم میٹرو اسٹیشن سے فاصلے پر ہے ۔ 

 پولیس کا کہنا ہے کہ ایس ایس پی انوسٹی گیشن کی سربراہی میں انوسٹی گیشن ٹیم نعش ملنے سے متعلق تحقیقات کرے گی۔شناخت کے بعد بچی کے ورثاء کی تلاش کی جائے گی۔ 

 خیال رہے کہ میٹرو بس کا یہ روٹ فی الحال فعال نہیں ہے اور یہاں تعمیراتی  کام جاری ہے۔