مقبوضہ کشمیر میں ساڑھے 5 ہزار اضافی قابض دستوں کی تعیناتی پر شدید تحفظات ہیں ، ترجمان دفتر خارجہ

ترجمان دفتر خارجہ  عاصم افتخار احمد کی جانب سے جاری کردہ بیان  میں کہا گیا ہے کہ  مقبوضہ کشمیر میں ساڑھے 5 ہزار اضافی قابض دستوں کی تعیناتی پر شدید تحفظات ہیں،  بھارتی قابض افواج نے کشمیریوں پر ناقابل تصور مظالم کیے ہیں،  ان مظالم میں پیلٹ گنز کا استعمال,  جعلی مقابلوں میں ماورائے عدالت قتل عام,  جبری گمشدگیاں, تشدد اور زیر حراست اموات شامل ہیں۔

عاصم افتخار احمد نے کہا کہ  پاکستان نے عالمی برادری کو   بھارتی ریاستی دہشت گردی،  انسانی حقوق کی کثیر خلاف ورزیوں،  جنگی جرائم پر ڈوزیئر دیا ہے،  ڈوزیئر میں عالمی برادری کو انسانیت کے خلاف جرائم کے ناقابل تردید ثبوت دئیے گئے ہیں، 9 لاکھ قابض افواج والے دنیا کے بڑے ملٹرائزڈ زون میں اضافی دستوں کی تعیناتی کشمیریوں پر مظالم میں اضافے کا باعث بنے گی۔