صدر، وزیراعظم کا بچوں کے عالمی دن کے موقع پران کے حقوق یقینی بنانے عزم کا اعادہ

بچوں کے عالمی دن کے موقع پراپنے خصوصی پیغام میں کہاہے کہ پاکستان کی حکومت ہربچے کو غربت، تشدد اورنارواسلوک سے تحفظ فراہم کرنے میں پرعزم ہے۔ ہم مسلسل کوششیں کررہے ہیں کہ ہربچے کومعیاری تعلیم اورصحت کی سہولیات فراہم کی جاسکے اورنسل، مذ ہب اورجنس کی بنیادپرکسی بچے کے ساتھ امتیازی سلوک نہ ہوں۔ 

صدرمملکت نے کہا کہ ہرسال بچوں کا عالمی دن 20 نومبر کو بچوں کے ان حقوق کے تحفظ کے لیے پاکستان کے وعدوں کی توثیق میں منایا جاتاہے جو نہ صرف آئین بلکہ بچوں کے حقوق وبین الاقوامی ادارہ محنت کے کنونشنز اور دیگر بین الاقوامی قوانین کے تحت تسلیم شدہ ہے اورجس کی پاکستان توثیق کرچکا ہے ۔

صدرمملکت کا کہنا تھا کہ سال رواں میں کوویڈ 19 کی عالمگیروبا کے خلاف مہم جاری رکھنے کے ساتھ ساتھ پاکستان اپنے بچوں کے بہترمستقبل کیلئے پرعزم ہے۔

 انہوں نے کہا کہ اپنے تعمیرنوکیلئے یہ بات انتہائی اہمیت کی حامل ہے کہ ہم مل کرکام کریں اورمیڈیا، کمیونٹی، والدین اوربچے خودآگے بڑھ کرپاکستان کے بچوں کی زندگیوں میں بہتری لانے کی قومی کوششوں میں اپنا تعمیری کرداراداکرے۔ 

وزیراعظم عمران خان  نے اپنے پیغام میں  کہاکہ بچوں سے مشقت کے خاتمے کیلئے بچوں کے تحفظ کے ادارے قائم کرنے سمیت مختلف قوانین بنائے جا رہے ہیں۔

انہوں نے کہاکہ دوسرے فلاحی اقدامات میں غذائی قلت کا شکار بچوں کیلئے غذائی تعاون اور صحت کارڈز کے ذریعے علاج معالجے کی فراہمی شامل ہیں۔

واضح رہے کہ آج (ہفتہ کو) پاکستان سمیت دنیابھرمیں بچوں کا عالمی دن  منایا جارہاہے۔