انگلینڈ: اومی کرون کے 55 فیصد کیسز کورونا ویکسی نیٹڈ افراد میں رپورٹ   

میڈیا رپورٹس کے مطابق ماہرین کو خدشہ ہے کہ اومی کرون پر موجودہ ویکسین کا اثر نہیں ہوتا۔ سائنسدانوں کا کہنا ہے کہ اومی کرون جنوبی افریقا میں کورونا کی ڈیلٹا قسم سے زیادہ تیزی سے پھیل رہا ہے۔ 

ڈیلٹا کے مقابلے میں بیماری دوبارہ لاحق ہونے کا خدشہ بھی 3 گنا زیادہ ہے۔

اومی کرون وائرس کے کیسز سامنے آنے والے ملکوں کی فہرست میں بھی اضافہ ہوتا جارہا ہے۔ لاطینی امریکا کے ملک میکسیکو کے نائب وزیر صحت نے کہا ہے کہ ملک میں کورونا کی قسم اومی کرون کا پہلا کیس رپورٹ ہوا ہے۔

رپورٹس کے مطابق اومی کرون کے امریکا میں 5 سے زیادہ اور فرانس کے دارالحکومت پیرس میں ایک کیس رپورٹ ہوچکا ہے۔

دوسری جانب بھارتی میڈیا کے مطابق دلی کے اسپتال میں اومی کرون ویرینٹ کے 12 مشتبہ کیسز سامنے آئے ہیں۔ کورونا وائرس ٹیسٹ مثبت آنے پر 8 افراد کو گزشتہ روز اور چار افراد کو آج اسپتال میں داخل کیا گیا۔

واضح رہے کہ موڈرنا کے سی ای او سٹیفین بنسل نے معروف اخبار فنانشل ٹائمز کو ایک انٹرویو دیتے ہوئے کہا تھا کہ کورونا وائرس کی موجودہ ویکسینز جتنی ڈیلٹا ویرینٹ کے لیے موثر تھیں، اتنی ان کے نئے وائرس کے خلاف مؤثر ہونے کے امکانات نہیں ہیں۔