اومی کرون کیسز میں اضافہ، برطانیہ میں مزید پابندیاں نافذ

تفصیلات کے مطابق برطانیہ میں کورونا کے اومی کرون ویرینٹ کیسز میں اضافے کے پیش نظر پلان بی کے نفاذ کا اعلان کردیا گیا ۔ اس حوالے سے برطانوی وزیراعظم بورس جانسن نے کہا ہے کہ اومی کرون کیسز کی تعداد سامنے آنے والے کیسز سے کہیں زیادہ ہے۔ لہذا  پرانی پابندیاں پھر سے  نافذ کی جارہی ہیں، پیر سے جن ورکرز کیلئے گھر سے کام کرنا ممکن ہے وہ گھر سے ہی کام کریں۔

بورس جانسن کا کہنا تھا کہ جمعے سے بیشتر عوامی مقامات پر ماسک پہننا لازمی ہوگا، تھیٹر اور سینما میں بھی ماسک کا استعمال کیا جائے گا۔اس ضمن میں  فیس ماسک سمیت کئی اقدامات متعارف کروائے گئے ہیں جبکہ  پابندیوں کے تحت   دکانوں، ریسٹورنٹس سمیت عوامی مقامات پر ویکسین پاسپورٹ لازمی قرار دے دیا گیا۔ 

دوسری جانب کورونا سے بچاؤ کے لیے نئی پابندیوں کے نفاذ کے بعد برطانوی پاؤنڈ کی قیمت  میں گراوٹ دیکھنے میں آئی ہے ۔ 

واضح رہے کہ برطانیہ میں  کورونا کی دوسری لہر کے دوران اومی کرون ویر ینٹ کے 100 سے زائد ریکارڈ کیسز رپورٹ ہوئے ہیں ۔