آر ایس ایس کی پالیسیاں علاقائی امن اور سلامتی کے لیے خطرہ ہیں:عمران خان

تفصیلات کے مطابق وزیراعظم عمران خان سے امریکی سینیٹ کے 4 رکنی وفد نے ملاقات کی ہے،چاروں سینیٹرز سینیٹ کی سلیکٹ کمیٹی برائے انٹیلی جنس کے ارکان ہیں۔ ملاقات میں افغانستان میں بدلتی ہوئی صورتحال کے حوالے سے گفتگو کی گئی۔

اس موقع پر وزیراعظم کا کہنا تھا کہ امن، استحکام اور اقتصادی ترقی کے مشترکہ مقاصد کو فروغ دینے کے خواہاں ہیں، پاکستان اور امریکہ کا گہرا تعلق ہونا چاہیے۔

عمران خان کا کہنا تھا کہ افغانستان میں انسانی بحران سے بچنے کے لیے فوری مدد کی ضرورت ہے، خطے میں سلامتی کے خطرات سے نمٹنے کے لیے قریبی تعاون کی اہمیت ہے۔

وزیراعظم نے وفد کو مقبوضہ کشمیر میں انسانی حقوق کی سنگین خلاف ورزیوں سے آگاہ کیا۔

ان کا کہنا تھا کہ آر ایس ایس سے متاثر بی جے پی کی انتہا پسند پالیسیاں علاقائی امن اور سلامتی کے لیے خطرہ ہیں، امریکہ کو خطے میں امن و استحکام کے لیے اپنا کردار ادا کرنا چاہیے۔

ان کا مزید کہنا تھا کہ ایسے اقدامات پر عمل کے لیے تیار ہے جس سے خطے میں امن و خوشحالی کو تقویت ملے۔