’ میں فخر سے بتانا چاہتا ہوں کہ 10 سال عوام کا نوکر بن کر کام کیا ‘ شہباز شریف کا ایف آئی اے کو جواب

تفصیلات کے مطابق  شہباز شریف کے ایف آئی اے کو جواب کی تفصیلات منظر عام پر آگئیں۔ایف آئی اے کا کہنا ہے کہ  شہباز شریف ہرسوال پر مناسب وقت اور لیگل ٹیم سے مشاورت کےلیے وقت مانگتے رہے، شہباز شریف فیڈرل انوسٹی گیشن کی ٹیم کو تسلی بخش جوابات نہیں دے سکے،  شہاز شریف سے رمضان شوگر مل، العریبہ شوگر مل کے زریعے 25 ارب منی لانڈرنگ سے متعلق پوچھا گیا۔

شہباز شریف نے جواب دیا کہ ایف آئی اے نے من گھڑت اور بے بنیاد الزامات لگائے، جو الزمات ایف آئی اے لگا رہی ہے اس پر نیب احتساب عدالت میں ریفرنس فائل کر چکا ہے، میں رمضان شوگر مل کا نہ تو ڈائریکٹر/شیئر ہولڈر ہوں نہ کبھی کوئی تنخواہ یا منافع حاصل کیا ہے۔

ایف آئی اے نے سوال کیا کہ وزیر اعلی ہاوس ماڈل ٹاون سے آپکی سبز رنگ کی لینڈ کروزر میں بھاری رقوم کی ترسیل ہوئی۔سلمان شہباز کی ہدایت پر وزیر اعلی کیمپ آفس اور گاڑی منی لانڈرنگ کےلیے استعمال کیا گیا۔جس پر شہباز شریف نے کہا میں اپنی لیگل ٹیم کی مشاورت سے اس سوال کا جواب دے سکتا ہوں۔ایف آئی اے نے سوال کیا کہ  غیر ملکی اثاثوں ،کمپنیوں، جائیدادوں، سرمایہ کاری یا اکاؤنٹس سب کی تفصیلات فراہم کریں جس پر اپوزیشن لیڈر نے کہا کہ   جواب کے لیے مناسب وقت دیا جائے اپنے وکیل/قانونی ٹیم سے مشورہ کرنے کے بعد یہ جواب دوں گا۔

ایف آئی اے نے سوال پوچھا کہ  اپنے خاندان کے سربراہ ہونے کے ناطے کیا آپ کی یہ ذمہ داری نہیں تھی کہ آپ یہ دیکھیں کہ اثاثے منی لانڈرنگ کے زریعے بنائے جا رہے ہیں، جعلی اکاونٹس کے زریعے سلمان شہباز اور حمزہ شہباز کے 25 ارب کی منی لانڈرنگ کو روکنے کےلیے کیا اقدامات کیے۔

جس پر شہباز شریف نے کہا کہ   اس کے لیے مجھے مناسب وقت دیا جائے، اپنے وکیل/قانونی ٹیم سے مشورہ کرنے کے بعد جواب دوں گا۔انہوں نے کہا کہ  میں فخر سے بتانا چاہتا ہوں کہ 10 سال عوام کا نوکر بن کر کام کیا، میں نے اور میری ٹیم نے انتھک محنت کے ساتھ عوام کے اربوں روپے بچائے،  میں اس تحقیقاتی ٹیم کو بتاتے ہوئے فخر محسوس کرتا ہوں،  میں اسے ریکارڈ کا حصہ بنانا چاہتا ہوں کہ گزشتہ 10 سال عوام کی خدمت کی،  جنتے بھی کام کیے قانون اور پیرا رولز کے مطابق کیے۔