پی آئی اے نے لاہور سے اسلام آباد فضائی آپریشن بحال کردیا

تفصیلات کے مطابق مسافروں کیلئے خوشخبری آگئی ، قومی ائیر لائن پی آئی اے کی جانب سے  کرونا وبا کی وجہ سے معطل   فضائی سروس بحال کردی گئی ہے ۔  پی آئی اے کے مطابق ہفتہ وار تین پروازیں چلائی جائیں گی۔ پہلی پرواز پی کے 650 لاہور سے اسلام آباد کے لئے روانہ ہو گئی ہے ۔ پروازوں کی بحالی پر لاہور ائر پورٹ پر کیک کاٹا گیا اور سٹیشن مینیجر علی اصغر زیدی اور پی آئی اے عملے نے مسافروں کو الوداع کیا ۔

ترجمان پی آئی اے  کے مطابق ابتدائی طور پر لاہور اور اسلام آباد کے درمیان دو طرفہ ہفتہ وار پروازیں بروز پیر، بدھ اور جمعہ کو آپریٹ کی جائیں گی۔

خیال رہے کہ گزشتہ سال اپریل میں پاکستان نے کوویڈ 19 کے پھیلاؤ کو روکنے کے لئے تمام بین الاقوامی اور قومی پروازیں معطل کردی گئی  تھیں۔