دنیا بھرمیں کورونا وائرس کے یومیہ کیسز کا نیا ریکارڈ قائم 

جی این این کے مطابق  دنیا بھر میں ایک بار پھر  کورونا نے پنجے گاڑ لیے ، مہلک وائرس سے ایک دن میں 10 لاکھ سے زائد کیسز رپورٹ ہوئے ہیں ۔ غیر ملکی میڈیا کے مطابق گزشتہ 7 دنوں میں دنیا بھر میں 73 لاکھ سے زائد کورونا کیسز رپورٹ ہو چکے ہیں۔  مختلف ملکوں میں اوسطاً ہر روز 10 لاکھ 45 ہزار کورونا کیسز رپورٹ ہو رہے ہیں۔

اعداد و شمارکے لحاظ سے23-29 دسمبر کے دوران  2019 کے آخر میں پہلی بار وائرس کے سامنے آنے کے بعد سے اب تک سب سے زیادہ افراد متاثر ہوئے ہیں ۔

 ڈبلیو ایچ او کے مطابق کورونا وائرس ابھی تک دنیا میں روزانہ ہزاروں انسانون کی موت کی وجہ بن رہا ہے۔ 

عالمی ادار ہ صحت نے خبردار کیا ہے کہ  کورونا کی " سونامی"  سے صحت کے نظام کو شدید نقصان پہنچنے کا خدشہ ہے ۔ عالمی ادارۂ صحت کے سربراہ ٹیڈروس  نے کہا ہے کہ کووڈ 19 کی اقسام ڈیلٹا اور اومیکرون کے ملاپ نے نئے متاثرین کے سونامی  میں اضافہ کیا   ہے ۔ کورونا وائرس کے پھیلاؤ کی وجہ سے ہیلتھ ورکرز اور ملکوں میں صحت کے نظام پر مزید بوجھ بڑھے گا جو تباہی کا دھانے پر ہیں۔‘

انہوں نے کہا کہ نظام صحت پر دباؤ ناصرف نئے کورونا وائرس کے مریضوں بلکہ صحت کے عملے کے بیمار ہونے کی وجہ سے پڑا تھا۔ٹیڈروس ایڈہانوم نے مزید کہا کہ جن لوگوں نے ویکسین نہیں لگوائی ان کا وائرس کے کسی بھی ویریئنٹ سے ہلاک ہونے کا بہت زیادہ خطرہ ہے۔

خبر ایجنسی  کے مطابق یورپ، امریکا اور کینیڈا میں 85 فیصد سے زائد کورونا کیسز رپورٹ ہوئے ہیں جبکہ دنیا بھر میں کورونا سے ہونے والی اموات میں کمی کا رجحان جاری ہے۔ 

دوسری جانب ڈنمارک، پرتگال، برطانیہ اور آسٹریلیا میں بھی نئے متاثرین کے اعداد و شمار کے ریکارڈ ٹوٹ چکے ہیں۔

بڑے یورپی ممالک کے دارالحکومت پیرس، لندن اور برلن میں نئے سال کے جشن کے حوالے سے تقریبات منسوخ کر دی گئی ہیں ۔ کچھ ممالک اب بھی پابندیاں عائد کرنے کے حوالے سے ہچکچاہٹ کا شکار ہیں ۔  اٹلی کی جانب سے نائٹ کلبز اور کھلے آسمان تلے ہونے والے اجتماعات پر پابندی عائد کی گئی ہے۔ 

دوسری جانب ماہرین نے بھی آنے والے مہینوں کو اس حوالے سے بہت اہم قرار دیا ہے۔