مری :  شدید برف باری کے باعث ہنگامی صورتحال، ٹریفک میں پھنسے افراد کو نکالنے کیلئے ضلعی انتظامیہ متحرک

تفصیلات کے مطابق  ‏مری میں  مسلسل شدید برف باری کے باعث ہنگامی صورتحال ،  ٹریفک میں پھنسے افراد کو نکالنے کیلئے ضلعی انتظامیہ اور پولیس متحرک  ہوگئی ۔

ترجمان ضلعی انتظامیہ  کاکہنا ہے کہ  انتظامیہ اور پولیس کے افسران فیلڈ میں موجود ہیں،  مری کے داخلی رستے بند کر دیئے گے ہیں،  معلومات کیلئے شہری مری کنٹرول روم (051)9269016 پر رابطہ کریں۔

دوسری جانب ٹریفک پولیس کا کہنا ہے کہ  ٹول پلازہ اور داخلی راستوں سے مزید گاڑیوں کو واپس ڈائیورٹ کیا جا رہا ہے ۔ سیاحوں کی بہتری اور سہولت کی خاطر مری میں مزید گاڑیوں کے داخلہ پر پابندی لگائی گئی ہے۔

سی پی او راولپنڈی ساجد کیانی نے کہا ہے کہ   ٹریفک کی روانی کو برقرار رکھنے کےلئے ضلعی پولیس اور ٹریفک پولیس بھرپور محنت کر رہی ہے۔  روڈ پر پھسلن اور برف کے باعث سیاحوں کو ڈرائیونگ میں مشکلات کا سامنا ہے۔ سی ٹی او راولپنڈی تیمور خان خود بھی اپنے سٹاف کے ہمراہ ایکسپریس وے پر ٹریفک کنٹرول کرنے میں مصروف ہیں ۔

چیف ٹریفک آفیسر راولپنڈی تیمور خان کا  کہنا تھا کہ  مسلسل جاری برفباری اور جگہ جگہ پھسلن کے باعث ٹریفک کی روانی متاثر ہو رہی ہے ،  سیاحوں کی سہولت کے لیے ٹریفک اہلکار اضافی اوقات میں بھی ڈیوٹی سر انجام دے رہے ہیں۔  ٹریفک افسران و جوان منفی درجہ حرارت میں بھی ٹریفک کی روانی کو برقرار رکھنے کےلئے بھرپور محنت کر رہے ہیں۔ٹریفک پولیس اہلکار برف میں پھنسی گاڑیوں کو کرین اور ٹو ٹرک کے ذریعے مدد فراہم کر رہے ہیں۔ شدید برفباری، پھسلن اور رش کی وجہ سے سیاح مری کی طرف سفر سے گریز کریں۔