سیالکوٹ: زمین کے تنازع پر معمر خاتون پر بہیمانہ تشدد، 

تفصیلات کے مطابق  سیالکوٹ میں انسانیت سوز واقعہ پیش آیا ہے۔ زمین کے تنازع پر معمر خاتون کو بہیمانہ تشدد کا نشانہ بنایا گیا۔ پولیس نے تشدد کرنے والے پانچ ملزمان کو گرفتار کرلیا۔

تھانہ کوٹلی سید امیر کے علاقے میں معمرخاتون  کو بالوں سے پکڑ کر  زمین پر گھسیٹا گیا۔ ڈنڈوں  اور جوتوں سے سرعام تشدد کا نشانہ بھی بنایا گیا۔

سیالکوٹ میں زمین کا تنازع، بااثر افراد کا بوڑھی خاتون پر بدترین تشدد#GNN @PTIofficial pic.twitter.com/KjBqEzhbuR

— GNN (@gnnhdofficial) January 9, 2022

پولیس کے مطابق واقعہ چند روز قبل پیش آیا۔ سیالکوٹ پولیس نے پندرہ مرد اور خواتین کے خلاف مقدمہ درج کرلیا۔

ڈی پی او سیالکوٹ کی تشکیل کردہ خصوصی ٹیم نے کارروائی کرتے ہوئے خاتون پر تشدد کرنے والے پانچ ملزم گرفتار کرلیے ہیں ۔گرفتار افراد میں ایک مرد اور چار خواتین شامل ہیں۔

ڈی پی او سیالکوٹ عمر سعید ملک کے مطابق واقعہ میں ملوث باقی ملزمان کی گرفتاری کےلیے ٹیمیں سرچ آپریشن کررہی ہیں۔تمام ملزمان کو گرفتار کرکے سخت سزا دلائی جائے گی۔

خیال رہے کہ آئی جی پنجاب نے بزرگ خاتون پر تشدد کے واقعہ کا نوٹس لیتے ہوئے ملزمان کی گرفتاری کی ہدایت کی تھی۔