اپوزیشن کی ہر جماعت کا اپنا ”ہاؤس ڈس آرڈر“ ہے ، ترجمان پنجاب حکومت

ترجمان پنجاب حکومت حسان خاور کا کہنا ہے کہ  اپوزیشن کی ہر جماعت کا اپنا ”ہاؤس ڈس آرڈر“ ہے،  جو اپوزیشن میں رہ کر متفق نہ ہو سکے وہ ان ہاؤس تبدیلی کیا لائیں گے،  شہباز شریف ٹی ٹیز اور سیاسی شعبدہ بازی کے ماہر ہیں،  شہباز شریف کا کردار چور مچائے شور والا ہے،  اپنے مجرم بھائی کے ضمانتی شہباز شریف کو سب سے پہلے اپنے وعدے اور زبان کی پاسداری کرنی چاہیئے۔

حسان خاور نے کہا کہ  ضامن بننے والے کو قانون اور قوم کے سامنے جوابدہ ہونا ہوگا، مری واقعہ پر بھی انہوں نے سیاست کرکے اخلاقی دیوالیہ پن کا مظاہرہ کیا، سندھ کی تباہی میں پیپلز پارٹی کی نالائقی اور نااہلی شامل ہے،سنگین مجرموں کا کھلم کھلا ہسپتالوں میں رہنا بلاول اور وزیراعلیٰ سندھ کا رپورٹ کارڈ ہے۔”بلاول مارچ“ نئے سال کی طفل تسلی ہے۔ قوم اس سیاسی بچگانہ پن پر ہنس رہی ہے۔