وزیر دفاع پرویز خٹک کے بھانجے پی ٹی آئی سے مستعفی

تفصیلات کے مطابق وزیر دفاع پرویز خٹک کے بھانجے پاکستان تحریک انصاف ( پی ٹی آئی )  سے مستعفی ہوگئے،  جلال خٹک اور بلال خٹک پاکستان مسلم لیگ ن میں شامل ہوگئے۔

جلال خٹک کا کہنا ہے کہ  پاکستان تحریک انصاف کو چھوڑ دیا یے، تخت بھائی میں مسلم لیگ ن کا باقاعدہ جلسہ کرونگا، موجودہ حکومت خواب خرگوش میں پڑی ہے۔انہوں نے مزید کہا کہ  حکومت جاگتی تو مری کا واقعہ رونما نہ ہوتا، بڑھتی ہوئی مہنگائی سے عوام عاجز آچکے ہیں۔ 

مسلم لیگ ن صوبائی صدر انجنیئر امیرمقام نے  پریس کانفرنس میں کہا کہ  پی ٹی آئی کا ساتھ دینے والوں کو اپنی غلطی کا احساس ہو گیا ہے، مرکز اور صوبہ میں عوام نے موجودہ حکومت کی کارکردگی دیکھ لی ہے، پاکستان ترقی کے دوڑ میں پیچھے رہ گیا ہے، تنخواہوں کے لئے بھی بھیک مانگی جارہی ہے، پورا ملک آئی ایم ایف کے حوالے کردیا گیاہے۔

امیر مقام  نے مزید کہا کہ  موجودہ حکمرانوں نے جھوٹ کے ریکارڈ توڑ ڈالے ہیں، پی ٹی آئی نے انتخابی وعدوں کی نفی ہے،  فارن فنڈ کو سامنے نہ لانے کے لیے بھرپور کوشش کی گئی، الیکشن کمیشن کی سکروٹنی کمیٹی نے فارن فنڈنگ کیس کا پول کھول دیا  ہے، موجودہ حکومت تمام تر ناکامیوں کا ملبہ دوسرے حکومتوں پر ڈال رہی ہے، تمام تر ثبوت کے باوجود حکمران  سچ کا سامنے نہیں کرسکتے ہیں۔

 امیرمقام نے مزید کہا کہ  عثمان بزدار کی ناقص کارکردگی عوام کے سامنے ہیں، بہت سے لوگ ان کی جماعت میں شمولیت کے خواہش مند ہیں، عام انتخابات میں بیٹ کا نشان لینے کے لیے  کوئی  ٹکٹ ہولڈر نہیں ہوگا۔