وزیراعظم آج قومی سلامتی پالیسی کا اجراء کرینگے

تفصیلات کے مطابق وزیراعظم عمران خان آج قومی سلامتی پالیسی کا اجراء کریں گے، سو سے زائد صفحات پر مشتمل پالیسی کا آدھا حصہ آج پبلک کیا جا رہا ہے ۔ قومی سلامتی پالیسی کے 50 کے قریب صفحات کے اہم نکات کا اعلان وزیر اعظم کریں گے، قومی سلامتی پالسی کے اعلان سے متعلق اہم تقریب آج دوپہر12 بجے وزیر اعظم آفس میں منعقد ہوگی ۔ تقریب میں وفاقی وزراء اور  اعلیٰ عسکری شخصیات شریک ہوں گی ۔ 

امن،رابطہ کاری اور ہمسایہ ممالک سے تعلقات قومی سلامتی پالیسی کا حصہ ہوں گے ،معاشی استحکام سیکیورٹی کو قومی سلامتی پالیسی میں مرکزی حیثیت  دیدی گئی ۔ نیشنل سیکیورٹی کمیٹی قومی سلامتی پالیسی کی وارث ہوگی اور ہر مہینے حکومت نیشنل سیکیورٹی کمیٹی کو عملدرآمد رپورٹ پیش کرنے کی پابند ہوگی۔

قومی سلامتی پالیسی میں دو سو سے زائد پالیسی ایکشن وضع کئے گئے ہیں جبکہ پالیسی ایکشن کا حصہ کلاسیفائیڈ تصور ہوگا۔ خطے میں امن، رابطہ کاری اور ہمسایہ ممالک کے ساتھ تجارت پالیسی کا بینادی نقطہ ہے۔

ہائبرڈ وار فیئر بھی قومی سلامتی پالیسی کا حصہ ہے جبکہ قومی سلامتی پالیسی میں ملکی وسائل کو بڑھانے کی حکمت عملی دی گئی ہے اور کشمیر کو پاکستان کی سلامتی پالیسی میں اہم قرار دیا گیا ہے۔

مسئلہ کشمیر کا حل پالیسی کی ترجیحات میں شامل ہے اور بڑھتی آبادی کو ہیومن سیکیورٹی کا بڑا چیلنج قرار دیا گیا ہے جبکہ شہروں کی جانب ہجرت، صحت، پانی اور ماحولیات، فوڈ اور صنفی امتیاز ہیومن سیکیورٹی کے اہم عنصر ہیں۔

عالمی پابندیاں ختم ہونے پر ایران جیسے ممالک سے روابط بھی پالیسی کا اہم جزو ہوگا۔ایران کے ساتھ معاملات عالمی پابندیاں ختم ہونے کے بعد آگے بڑھانے کا اختیار حکومت وقت کو تجویز کیا گیا ہے جبکہ گڈ گورننس، سیاسی استحکام ، فیڈریشن کی مضبوطی بھی پالیسی کا حصہ ہیں۔

پاکستان میں قومی سلامتی سے متعلق پہلی بار جامع پالیسی تیار کی گئی ہے جبکہ سلامتی پالیسی پر سالانہ بنیادوں پر نظرثانی کی جائے گی اور ہر نئی حکومت کو پالیسی پر ردوبدل کا اختیار حاصل ہوگا۔