مری ،گلیات، کشمیر سمیت دیگر مقامات پر برف باری، لینڈ سلائیڈنگ کا امکان، الرٹ جاری

تفصیلات کے مطا بق پاکستان میٹریلوجیکل ڈیپارٹمنٹ نے ہفتے اور اتوار کو موسم کی غیر یقینی صورتحال کی الرٹ جاری کردی ہے۔ لاہور، گوجرانولہ ،فیصل آباد، سیالکوٹ، پنڈی میں تیز بارشوں کا امکان ہے۔

پاکستان میٹریلوجیکل ڈیپارٹمنٹ کے مطابق  مری ،گلیات، کشمیر سمیت دیگر مقامات پر برف باری لینڈ سلائیڈنگ کا امکان ہے، تمام متعلقہ اداروں کو  الرٹ رہنے کی ہدایت جاری کردی گئیں ۔

سی ٹی او راولپنڈی وسیم ریاض کا کہنا ہے کہ مکینیکلی فٹ گاڑی اور لائسنس ہولڈر ڈرائیورز کو ہی مری جانے کی اجازت ہوگی،جبکہ مری آنے والے سیاح موسم کی شدت اور رش کی صورتحال کو مدنظر رکھیں۔مری  میں شام 5 سے صبح 5 بجے تک سیاحوں کے مری میں داخلے پر پابندی ہوگی،جبکہ   8 ہزارسے زائد گاڑیوں کو داخلے کی اجازت نہیں ہوگی۔ مری کے داخلی راستوں پرخصوصی چیکنگ پکٹس قائم کی گئی ہیں۔

سی ٹی او  نے کہا کہ سیاح  گاڑی میں اضافی گرم کپڑے اور کھانے پینے کی اشیاء ضرور رکھیں،  گاڑی میں ہیٹرکے استعمال اور شیشوں کو مکمل بند کرنے سے کاربن مونو آکسائیڈ پیدا ہوتی ہے۔انہوں نے کہا کہ  دوران برفباری گاڑی خراب ہونے یا برف میں پھنسنے پر گاڑی میں رات گزارنے سے اجتناب کریں۔ برفباری کے دوران  سلپری روڈ ہونے کے باعث گاڑیوں کے ٹائروں پر چین کا استعمال کریں اور  برف ہٹانے والی مشینوں کو فوری راستہ دیں۔