جسٹس عائشہ ملک  نے سپریم کورٹ کی پہلی خاتون جج کا حلف اٹھا لیا

تفصیلات کے مطابق جسٹس عائشہ ملک کی سادہ اورپروقارتقریب حلف برداری سپریم کورٹ میں ہوئی جہاں چیف جسٹس آف پاکستان گلزاراحمد نے جسٹس عائشہ ملک سے حلف  لیا ۔ سپریم کورٹ کےجج صاحبان،اٹارنی جنرل اورایڈووکیٹ جنرل تقریب میں شریک  ہوئے جبکہ  سینیئروکلاءاور عدالتی عملہ بھی تقریب حلف برداری میں شریک ہوئے ۔ 

واضح رہے کہ صدر مملکت نے آئین کے آرٹیکل 177 کی کلاز ون کے تحت   جسٹس عائشہ اے ملک کو جج سپریم کورٹ آف پاکستان تعیناتی کی منظوری دی تھی  جبکہ صدر پاکستان کی منظوری کے بعد وزارت قانون و انصاف نے نوٹیفکیشن جاری کردیا ہے۔

جسٹس عائشہ ملک کا تعارف

جسٹس عائشہ ملک 1966 میں لاہور میں پیدا ہوئیں اور ابتدائی تعلیم پیرس اور نیویارک سے حاصل کیں اور پھر کراچی گرامر اسکول سے سینئر کیمبرج مکمل کیا۔

انہوں نے لاہور میں پاکستان کالج آف لا سے قانون کی تعلیم حاصل کی اور پھر ایل ایل بی کرنے کے لیے ہارورڈ لا اسکول کیمبرج، میساچیوسٹیس، امریکا گئیں جہاں انہیں 1998-1999 میں لندن ایچ گیمن کی فیلو نامزد کیا گیا۔

جسٹس عائشہ ملک لاہورہائی کورٹ میں جج تعینات ہونے تک رضوی، عیسیٰ، آفریدی اور اینگل لا فرم کے ساتھ پہلے سینئر ایسوسی ایٹ اور پھر فرم کے لاہور دفتر میں انچارج کے طور پر کام کرتی رہیں۔

وہ 2012 میں لاہور ہائی کورٹ کی جج تعینات ہوئی تھیں اور اس وقت وہ چوتھی سینئر ترین جج کے طور پر کام کر رہی ہیں۔

انہیں بینکنگ، این جی اوز، مائیکرو فنانس اور اسکلز ٹریننگ پروگرامز کی ماہر وکیل تصور کیا جاتا ہے۔

انہوں نے تحقیقی کام کیا اور پنجاب یونیورسٹی میں بینکنگ لا پڑھایا اور کالج آف اکاؤنٹنگ اور مینیجمنٹ سائنسز کراچی میں مرکنٹائل لا پڑھاتی رہی ہیں۔